چارلی کرک کی اہلیہ، ایریکا کرک، نے پہلی بار اپنے شوہر کے قتل کے بعد عوامی طور پر بیان دیا ہے۔
دائیں بازو کے سرگرم رہنما اور سابق امریکی صدر ڈونلڈ ٹرمپ کے قریبی ساتھی چارلی کرک کو بدھ کے روز یوٹاہ ویلی یونیورسٹی میں ایک تقریب کے دوران قتل کر دیا گیا تھا۔ ایریکا کرک نے عزم ظاہر کیا کہ وہ اپنے شوہر کی میراث کو کبھی مرنے نہیں دیں گی۔
ایریکا نے اپنے شوہر کے آفس سے خطاب کرتے ہوئے کہا کہ چارلی اپنے بچوں سے محبت کرتے تھے اور مجھے دل کی گہرائیوں سے چاہتے تھے۔
یہ بھی پڑھیے: چارلی کرک کے قتل کے مرکزی ملزم کی اطلاع کس نے دی؟
انہوں نے قانون نافذ کرنے والے اداروں کا شکریہ ادا کیا جنہوں نے قاتل کو گرفتار کرنے کے لیے دن رات محنت کی۔ ساتھ ہی انہوں نے اپنے شوہر کے قاتلوں کے لیے سخت پیغام بھی دیا اور کہا کہ تمہیں اندازہ بھی نہیں ہے کہ تم نے اس بیوی کے دل میں کیسی آگ بھڑکا دی ہے۔ ایک بیوہ کی پکار دنیا بھر میں جنگی نعرے کی طرح گونجے گی۔
ایریکا کرک، جن کی شادی 2021 میں چارلی سے ہوئی تھی اور جو ایک 3 سالہ بیٹی اور ایک سالہ بیٹے کی ماں ہیں، نے سابق صدر ٹرمپ کا بھی شکریہ ادا کیا۔ انہوں نے کہا کہ ان کے شوہر ٹرمپ سے محبت کرتے تھے اور ٹرمپ نے ہمیشہ ان کی حمایت کی۔ آپ نے انہیں بے حد سپورٹ کیا، جیسے انہوں نے آپ کے لیے کیا۔
یہ بھی پڑھیے: چارلی کرک کے مبینہ قاتل کو حراست میں لے لیا گیا، صدر ٹرمپ کا اعلان
خطاب کے دوران ایریکا نے اپنی بیٹی کے ساتھ ہونے والی ایک دردناک گفتگو بھی شیئر کی اور کہا کہ کل رات جب میری بیٹی میرے پاس آئی تو اس نے پوچھا کہ ڈیڈی کہاں ہیں؟ میں نے اسے کہا کہ بیٹا، ڈیڈی تم سے بہت محبت کرتے ہیں۔ فکر نہ کرو، وہ یسوع کے پاس گئے ہیں تاکہ تمہارے بلیو بیری بجٹ کے لیے کما سکیں۔
اپنے شوہر سے مخاطب ہو کر ایریکا نے کہا کہ میں وعدہ کرتی ہوں کہ تمہاری میراث کو کبھی مرنے نہیں دوں گی۔ میں تمہاری تحریک کو اس قوم کی سب سے بڑی تحریک بنا دوں گی۔
انہوں نے کہا کہ افراتفری، شک اور غیر یقینی سے بھری اس دنیا میں میرے شوہر کی آواز ہمیشہ قائم رہے گی۔
