پنجاب اسمبلی نے آج متعدد اہم قراردادیں کثرت رائے سے منظور کیں۔
ایک قرارداد میں سانحہ آرمی پبلک سکول اور سقوط ڈھاکہ کو یاد کرتے ہوئے قومی یکجہتی، اتحاد اور دہشت گردی کے خاتمے کی ضرورت پر زور دیا گیا۔ قرارداد حکومتی رکن رانا محمد ارشد نے پیش کی۔
یہ بھی پڑھیے: بھارتی وزیراعلیٰ کی جانب سے مسلمان خاتون کا نقاب کھینچنے کا واقعہ، پنجاب اسمبلی میں مذمتی قرارداد جمع
ایوان نے شہدا کی قربانیوں کو یاد کرتے ہوئے افواج پاکستان کی خدمات کو سراہا اور نوجوانوں سے توقع ظاہر کی کہ وہ وطن کے لیے یکجہتی اور حوصلے کے ساتھ کام کریں۔ سابق وزیر اعظم محمد نواز شریف اور موجودہ وزیراعظم میاں محمد شہباز شریف کے جرات مندانہ فیصلوں کو بھی خراج تحسین پیش کیا گیا۔
ایوان نے ایک متفقہ قرارداد کے ذریعے چیف آف ڈیفنس فورسز جنرل حافظ عاصم منیر کو قومی اداروں میں خود احتسابی اور شفافیت کے فروغ پر خراج تحسین پیش کیا۔
قرارداد میں کہا گیا ہے کہ جنرل عاصم منیر کی قیادت میں پاک فوج نے اداروں کی ساکھ، آئین کی بالادستی اور قومی مفاد کو یقینی بنایا اور فیلڈ جنرل کورٹ مارشل کے فیصلے کو انصاف اور ادارہ جاتی سالمیت کے لیے قابل ستائش قرار دیا گیا۔
یہ بھی پڑھیے: انقرہ: سانحہ آرمی پبلک اسکول کی یاد میں تقریب، بچوں اور عملے کو خراج عقیدت پیش کیا گیا
اسی اجلاس میں بھارت کے صوبہ بہار کے وزیراعلیٰ نتیش کمار کے خلاف مذمتی قرارداد بھی منظور کی گئی۔ اپوزیشن اور حکومتی اراکین کی جانب سے پیش کی گئی قرارداد میں مسلم خاتون کا نقاب کھینچنے کے واقعے کو بے شرمانہ، گھٹیا اور نسل پرستانہ عمل قرار دیا گیا اور بھارت میں اقلیتوں کی غیر محفوظ صورتحال پر تشویش کا اظہار کیا گیا۔ عالمی اداروں سے بھارت سے معافی مانگنے کا مطالبہ بھی کیا گیا۔
پنجاب اسمبلی نے قرآن پاک کے مقدس اوراق کے تحفظ سے متعلق قرارداد بھی منظور کی۔ حکومتی رکن پیر اشر رسول کی جانب سے پیش کی گئی قرارداد میں مساجد اور مدارس میں ضعیف شدہ اور بے ادبی سے تلف ہونے والے قرآنی اوراق پر تشویش ظاہر کی گئی اور تمام اضلاع کے ڈپٹی کمشنرز کو تحفظ کے اقدامات کی سفارش کی گئی۔
