پاکستان کے وزیر برائے مذہبی امور سردار محمد یوسف نے کہا ہے کہ عالمی سطح پر تیل کی قیمتوں میں اضافے کے باوجود حج 2026 کے لیے پاکستانی عازمین کو فضائی کرایوں میں کسی اضافے کا سامنا نہیں کرنا پڑے گا۔
یہ پیش رفت ایسے وقت میں سامنے آئی ہے جب مشرق وسطیٰ میں جاری امریکا اور اسرائیل کی ایران کے خلاف جنگ کے باعث توانائی کی سپلائی اور علاقائی فضائی راستے متاثر ہو رہے ہیں، جس کے نتیجے میں عالمی سطح پر تیل کی قیمتوں میں اضافہ دیکھا جا رہا ہے۔
یہ بھی پڑھیے: پبلک ٹرانسپورٹ کے کرایوں میں کوئی اضافہ نہیں کیا جائےگا، وزیراعلیٰ سندھ
وزیر مذہبی امور کے مطابق حکومت پاکستان نے ایئرلائنز کے ساتھ معاہدہ کیا ہے، جس کے تحت طے شدہ پیکیج کے مطابق ہی عازمین کو سعودی عرب منتقل کیا جائے گا۔
انہوں نے کہا کہ ‘اس معاہدے کے تحت ایئرلائنز پابند ہیں کہ حج پیکیج میں کوئی اضافہ نہ کیا جائے، اس لیے کرایوں میں اضافہ نہیں ہوگا۔’
سردار محمد یوسف نے بتایا کہ پاکستان سے اس سال مجموعی طور پر 1 لاکھ 79 ہزار 210 عازمین حج ادا کریں گے، جن میں سے 1 لاکھ 19 ہزار 210 سرکاری اسکیم کے تحت جبکہ 60 ہزار افراد پرائیویٹ ٹور آپریٹرز کے ذریعے جائیں گے۔
یہ بھی پڑھیے: اسلام آباد پولیس کا شہریوں سے زیادہ کرایہ وصول کرنے والے ٹرانسپورٹرز کے خلاف کریک ڈاؤن
انہوں نے مزید کہا کہ حج آپریشن کا شیڈول پہلے کی طرح برقرار ہے اور پہلی پرواز 18 اپریل کو روانہ ہوگی۔ سعودی عرب میں پاکستان کے سفیر احمد فاروق نے بھی کہا ہے کہ حکومت پاکستان اور حج مشن نے گزشتہ برسوں کی طرح تمام انتظامات مکمل کر لیے ہیں اور حج کا شیڈول برقرار رہے گا۔











