ہالی ووڈ کے سپر اسٹار ٹام کروز نے 64 سال کی عمر میں بھی غیرمعمولی فٹنس برقرار رکھنے اور اپنی فلموں کے خطرناک اسٹنٹس خود انجام دینے کا راز بتا دیا۔ اداکار کا کہنا ہے کہ سخت نظم و ضبط، روزانہ ورزش، متوازن غذا اور صحت مند طرزِ زندگی ہی انہیں آج بھی ایکشن فلموں کے مشکل ترین مناظر انجام دینے کے قابل بنائے ہوئے ہیں۔
فلم ‘Mission: Impossible – The Final Reckoning’ کی تشہیری مہم کے دوران ٹام کروز نے کہا کہ اچھی صحت کسی وقتی کوشش کا نہیں بلکہ مستقل مزاجی کا نتیجہ ہوتی ہے۔ ان کے مطابق وہ ہفتے کے ساتوں دن اپنی جسمانی فٹنس پر توجہ دیتے ہیں۔
یہ بھی پڑھیں: ٹام کروز اور آنا دی آرمس کا تعلق محض 9 ماہ بعد ہی ختم، کیا وجہ بنی؟
ٹام کروز نے کہا کہ ’میں اپنے جسم کو ایک گاڑی کی طرح سمجھتا ہوں جس کی باقاعدگی سے دیکھ بھال ضروری ہے۔ جس طرح روزانہ دانت صاف کرنا معمول کا حصہ ہے، اسی طرح ورزش بھی میری روزمرہ زندگی کا لازمی حصہ ہے‘۔
اداکار نے بتایا کہ مسلسل ورزش ہی انہیں فلموں میں مشکل اور خطرناک مناظر خود انجام دینے کے قابل بناتی ہے۔ ان کے مطابق فٹنس صرف جسمانی طاقت نہیں بلکہ طویل مدت تک اپنی صلاحیت برقرار رکھنے کا ذریعہ بھی ہے۔
یہ بھی پڑھیں: مشن حلوہ ریکننگ: ٹام کروز سخت گرمی کے باوجود ملتان میں کیا کر رہے ہیں؟
رپورٹس کے مطابق “Mission: Impossible – The Final Reckoning” کی تیاری کے دوران ٹام کروز کے فٹنس پروگرام میں جسمانی لچک (Flexibility)، حرکت پذیری (Mobility) اور ریکوری پر خصوصی توجہ دی گئی تاکہ وہ مشکل اسٹنٹس محفوظ انداز میں انجام دے سکیں۔
Men’s Health UK کے مطابق ٹام کروز کی ورزش میں سمندری کائیکنگ، غاروں کی مہم جوئی، فینسنگ، ٹریڈ مل پر دوڑ، ویٹ ٹریننگ، راک کلائمبنگ اور جاگنگ شامل ہیں، جبکہ وہ کارڈیو اور اسٹرینتھ ٹریننگ کو بھی اپنی روزمرہ روٹین کا حصہ بنائے رکھتے ہیں۔
یہ بھی پڑھیں: ’ٹام کروز نے بھی پی ٹی آئی چھوڑنے کا فیصلہ کر لیا‘
غذا کے حوالے سے رپورٹ کیا گیا ہے کہ ٹام کروز دن میں تین بڑے کھانوں کے بجائے تقریباً 15 ہلکے اسنیکس کھانے کو ترجیح دیتے ہیں۔ ان کی خوراک میں بغیر تیل، مکھن یا ساس کے بھاپ میں پکی سفید مچھلی اور سبزیاں شامل ہوتی ہیں جبکہ وہ مکمل طور پر الکوحل سے اجتناب کرتے ہیں۔
ٹام کروز کا کہنا ہے کہ صحت مند طرزِ زندگی، باقاعدہ ورزش اور متوازن غذا ہی انہیں آج بھی فلمی دنیا کے مشکل ترین ایکشن مناظر خود انجام دینے کے قابل بناتی ہے۔
