مودی مخالف ویڈیوز پر میٹا انڈیا کے سربراہ کے خلاف مقدمہ درج

 حیدرآباد پولیس نے فیس بک پر وزیرِاعظم نریندر مودی سے متعلق مبینہ توہین آمیز ویڈیوز کے معاملے میں کارروائی شروع کردی ہے۔

بھارت کے شہر حیدرآباد میں پولیس نے میٹا انڈیا کے سربراہ ارون سرینواس کے خلاف فیس بک پر وزیرِاعظم نریندر مودی سے متعلق مبینہ توہین آمیز ویڈیوز کے معاملے میں مقدمہ درج کرلیا ہے۔

یہ بھی پڑھیں: امریکا میں بدعنوانی کا مقدمہ: مودی کے ساتھی گوتم اڈانی کروڑوں ڈالر جرمانہ ادا کرکے جان چھڑانے پر مجبور

برطانوی خبر رساں ادارے رائٹرز کے مطابق حیدرآباد کے ڈپٹی کمشنر پولیس (سائبر کرائم) وی اروند بابو نے بتایا کہ پولیس جلد ہی میٹا کو بھی اس معاملے میں نوٹس جاری کرے گی۔

یہ ویڈیوز ایسے وقت میں سامنے آئیں جب بھارت میں قومی امتحانات کے پرچے لیک ہونے کے خلاف نوجوانوں کی قیادت میں بڑے پیمانے پر احتجاج جاری ہے، جس کے نتیجے میں وزیرِ تعلیم کو استعفیٰ دینا پڑا۔

رپورٹ کے مطابق میٹا نے اس معاملے پر فوری طور پر کوئی ردعمل نہیں دیا۔

بھارت نے رواں سال سوشل میڈیا پلیٹ فارمز سے متعلق قوانین مزید سخت کر دیے ہیں، جس کے تحت عدالت یا حکومت کی جانب سے غیرقانونی قرار دیے گئے مواد کو 3 گھنٹے کے اندر ہٹانا لازمی ہے، جبکہ اس سے قبل یہ مدت 36 گھنٹے تھی۔ مقررہ وقت میں مواد نہ ہٹانے کی صورت میں پلیٹ فارمز کو حاصل قانونی تحفظ ختم  ہوسکتا ہے۔

یہ بھی پڑھیں: مودی حکومت نے سیور لائنوں میں 261 ہلاک ورکرز کے اعداد و شمار چھپائے، صفائی کرمچاری آندولن

بھارتی قانونی ماہر آکاش کرمکار کے مطابق کسی کمپنی کے اعلیٰ عہدیدار کو ذاتی طور پر ذمہ دار ٹھہرانے کے لیے یہ ثابت کرنا ضروری ہوتا ہے کہ اسے معاملے کا علم تھا اور اس نے فعال کردار ادا کیا۔

رپورٹ میں کہا گیا ہے کہ میٹا کو ماضی میں بھی بھارتی حکومت کی جانب سے فیس بک اور انسٹاگرام پر نفرت انگیز مواد اور غلط معلومات کے پھیلاؤ کے حوالے سے تنقید کا سامنا رہا ہے۔

رواں ہفتے بھارتی وزارتِ اطلاعاتی ٹیکنالوجی نے بھی میٹا کے حکام کو طلب کیا تھا، کیونکہ فیس بک نے تکنیکی غلطی کے باعث وزیرِاعظم نریندر مودی کی ایک پوسٹ عارضی طور پر محدود کردی تھی۔ بعد ازاں میٹا نے وضاحت کی تھی کہ یہ اقدام غیر ارادی طور پر ہوا۔

رپورٹ کے مطابق بھارت فیس بک کے صارفین کی تعداد کے لحاظ سے دنیا کی سب سے بڑی منڈی ہے۔ ارون سرینواس جولائی 2025 سے میٹا انڈیا کے منیجنگ ڈائریکٹر اور سربراہ کے طور پر خدمات انجام دے رہے ہیں۔

یہ بھی پڑھیں: یاسین ملک کے خلاف 34 سال پرانے مقدمے کا نیا موڑ بھارتی حکومت کے الزامات پر سوالات اٹھنے لگے

مقامی میڈیا کے مطابق یہ مقدمہ حکمراں بھارتیہ جنتا پارٹی (بی جے پی) کے حامیوں کی شکایات پر درج کیے گئے متعدد مقدمات میں سے ایک ہے، جن میں الزام عائد کیا گیا ہے کہ میٹا کے پلیٹ فارمز پر وزیرِاعظم نریندر مودی کی مبینہ طور پر تبدیل شدہ ویڈیوز اور تصاویر پھیلائی جارہی تھیں۔