یومِ آزادی پاکستان کے موقع پر اسلام آباد، راولپنڈی اور جڑواں شہروں کے مختلف علاقوں میں آج 13 اگست کی رات سے ہی جشنِ آزادی کی تقریبات کا سلسلہ شروع ہو جائے گا، جہاں آتش بازی، ملی نغموں، میوزیکل شوز اور دیگر رنگا رنگ پروگرام شہریوں اور بالخصوص فیملیز کی توجہ کا مرکز بنیں گے۔ جشنِ آزادی کی تقریبات کا سب سے نمایاں مرکز یادگارِ فتح ہوگا، جہاں رات 12 بجے شاندار آتش بازی کے ساتھ 14 اگست کے روز بھی بڑی تقریبات منعقد ہوں گی۔
یادگارِ فتح پر سب سے بڑا شو، رات 12 بجے آتش بازی
جڑواں شہروں میں یومِ آزادی کی رات ہونے والی تقریبات میں سب سے زیادہ توجہ یادگارِ فتح پر ہونے والی آتش بازی کو حاصل ہے۔ 13 اگست کی رات 12 بجے آسمان رنگ برنگی روشنیوں سے جگمگا اٹھے گا اور شہری ایک بڑے آتش بازی کے مظاہرے سے لطف اندوز ہوں گے۔ یادگارِ فتح کی آتش بازی دیکھنے کے لیے آئی جے پی روڈ، قریبی بلند مقامات اور فیصل آباد برج سمیت مختلف مقامات سے بھی خوبصورت منظر دیکھا جا سکے گا، وزیر اعظم شہباز شریف یادگار فتح کا افتتاح کریں گے جبکہ فیلڈ مارشل عاصم منیر، وزرائے اعلی، وزرا اور مختلف سفیر اس تقریب میں شرکت کریں گے۔
مزید پڑھیں:نیویارک میں یومِ آزادی کی تقریبات کے دوران فائرنگ، 4 بچوں سمیت 8 افراد زخمی
14 اگست کو اسی مقام پر جشنِ آزادی کی بڑی تقریب متوقع ہے، جس میں قومی جوش و جذبے کو اجاگر کرنے والے پروگرامز کے ساتھ فضائی مظاہرے بھی خصوصی توجہ کا مرکز بنیں گے۔ آسمان پر مختلف رنگوں کے طیاروں کی پرواز کے ساتھ جے ایف 17 تھنڈر کے فلائی پاسٹ کا بھی خصوصی انتظام بتایا گیا ہے، جس کے باعث تقریب کی اہمیت مزید بڑھ گئی ہے۔
اسلام آباد میں پاک ترکیہ اور سعودی عرب کے معاہدے کی خوشی میں جشن اور شاندار آتش بازی#islamabad #fireworks pic.twitter.com/8lZTBy51Ws
— Syed Askar Ali Shah (@syedaskar451) August 9, 2026
فیصل ہلز میں جشنِ آزادی کی سب سے بڑی آتش بازی کی تیاریاں
ہر سال کی طرح اس مرتبہ بھی فیصل ہلز میں جشنِ آزادی کے موقع پر بڑی آتش بازی شہریوں کی توجہ کا مرکز بننے جا رہی ہے۔ 13 اگست کی رات منعقد ہونے والی آتش بازی دیکھنے کے لیے بڑی تعداد میں خاندانوں کی آمد متوقع ہے۔ فیصل ہلز میں جشنِ آزادی کے حوالے سے دیگر تفریحی سرگرمیوں اور فیملی ایونٹس کا بھی اہتمام کیا جا رہا ہے، جس کے باعث یہ مقام جڑواں شہروں کے شہریوں کے لیے ایک اہم تفریحی مرکز بن سکتا ہے، فیصل ٹاؤن ون میں بھی آتش بازی کا خصوصی اہتمام کیا گیا ہے۔
نیو بلیو ایریا بھی روشنیوں سے جگمگائے گا
جشنِ آزادی کی رات اسلام آباد کے نیو بلیو ایریا میں بھی رات 12 بجے آتش بازی کا اہتمام کیا جا رہا ہے۔ شہریوں کی بڑی تعداد کے پیش نظر یہاں بھی جشنِ آزادی کا ماحول دیکھنے کو ملے گا۔
ڈی چوک پر سی ڈی اے کی آتش بازی، 14 اگست کو شام پانچ بجے خصوصی تقریب
اسلام آباد کے مرکزی مقام ڈی چوک پر بھی جشنِ آزادی کے سلسلے میں خصوصی پروگرامز ترتیب دیے گئے ہیں۔ 13 اگست کی رات سی ڈی اے کی جانب سے آتش بازی کا مظاہرہ کیا جائے گا جبکہ 14 اگست کو شام پانچ بجے ڈی چوک پر مرکزی نوعیت کی جشنِ آزادی کی تقریب منعقد کی جائے گی۔
اس تقریب میں قومی پرچم کشائی، ملی نغموں اور دیگر قومی و ثقافتی پروگرامز کے ذریعے یومِ آزادی کا جشن منایا جائے گا۔ شہریوں کے لیے یہ تقریب خصوصی اہمیت رکھتی ہے کیونکہ ڈی چوک اسلام آباد کے اہم ترین عوامی مقامات میں شمار ہوتا ہے، ساحر علی بگا، نمرہ مہرہ اور خماریاں برینڈ کا کنسرٹ بھی ہو گا۔
مزید پڑھیں:یومِ آزادی پر ’لائف بوائے رن فار پاکستان‘، دنیا بھر کے پاکستانی ایک ساتھ دوڑیں گے
جشنِ آزادی کے موقع پر لوک ورثہ میں بھی شہریوں کے لیے خصوصی اور مفت پروگرام کا اہتمام کیا جا رہا ہے۔ پروگرام میں ملی نغموں کے علاوہ پاکستان کی ثقافت اور قومی جذبے کو اجاگر کرنے والے مختلف شوز پیش کیے جائیں گے۔ منتظمین کی جانب سے اسے فیملیز کے لیے ایک بھرپور تفریحی پروگرام بنانے کی تیاری کی گئی ہے۔
پی این سی اے میں بھی گرینڈ جشنِ آزادی
جشنِ آزادی کے سلسلے میں پاکستان نیشنل کونسل آف دی آرٹس (PNCA) میں بھی ایک بڑا پروگرام منعقد کیا جا رہا ہے، جس میں ملی نغموں، قومی و ثقافتی پروگرامز اور دیگر سرگرمیوں کے ذریعے پاکستان کے یومِ آزادی کو خراجِ تحسین پیش کیا جائے گا۔
اس کے علاوہ اسلام آباد کے مختلف مقامات پر نجی سطح پر بھی جشنِ آزادی کے پروگرامز منعقد کیے جا رہے ہیں تاکہ شہری اپنے خاندانوں کے ساتھ یومِ آزادی کی خوشیاں منا سکیں۔
ایف نائن پارک میں بھی فیملیز کے لیے خصوصی پروگرام
ایف نائن پارک میں بھی 14 اگست کے موقع پر خصوصی فیملی ایونٹ کا اہتمام کیا جا رہا ہے۔ پروگرام میں میوزیکل سرگرمیوں کے ساتھ آتش بازی کا سماں بھی دیکھنے کو ملے گا۔ بچوں، نوجوانوں اور خاندانوں کے لیے مختلف تفریحی سرگرمیوں کے باعث ایف نائن پارک بھی جشنِ آزادی منانے کے لیے شہریوں کی توجہ کا مرکز بنے گا۔
جڑواں شہروں میں آج رات جشن کا سماں
یومِ آزادی کے موقع پر اسلام آباد اور راولپنڈی میں 13 اگست کی رات سے ہی مختلف علاقوں میں سبز ہلالی پرچم، قومی ترانوں، روشنیوں اور آتش بازی کے ذریعے جشن کا آغاز ہو جائے گا۔ دوسری جانب 14 اگست کو سرکاری تقریبات کے ساتھ ساتھ شہریوں کے لیے متعدد مفت اور فیملی فرینڈلی پروگرامز بھی منعقد کیے جا رہے ہیں۔
مزید پڑھیں:اسلام آباد میں یومِ آزادی کی بڑی تقریب، داخلہ مفت
یادگارِ فتح کی نصف شب کی آتش بازی، فیصل ہلز اور فیصل ٹاؤن ون کے خصوصی پروگرام، نیو بلیو ایریا اور ڈی چوک کی تقریبات، لوک ورثہ کے میوزیکل پروگرام، پی این سی اے کا گرینڈ ایونٹ اور ایف نائن پارک کی سرگرمیاں اس سال جشنِ آزادی کے نمایاں پروگرامز میں شامل ہوں گی۔
شہریوں کی جانب سے توقع کی جا رہی ہے کہ 13 اور 14 اگست کی رات جڑواں شہروں میں جشنِ آزادی کے رنگ نمایاں ہوں گے اور خاندان بڑی تعداد میں ان تقریبات میں شرکت کرکے یومِ آزادی کی خوشیاں منائیں گے۔
