اسلام آباد میں غیر ملکی وفود کی آمدورفت، مختلف شاہراہوں پر ٹریفک ڈائیورشن کا اعلان

جمعرات 8 اکتوبر 2026
icon-facebook icon-twitter icon-whatsapp

اسلام آباد پولیس نے غیر ملکی وفود کی آمدورفت کے پیش نظر شہر کی مختلف اہم شاہراہوں پر مختلف اوقات میں ٹریفک ڈائیورشن لگانے کا اعلان کیا ہے اور شہریوں کو متبادل راستے اختیار کرنے کی ہدایت کی ہے۔

اسلام آباد پولیس کے ترجمان کے مطابق سری نگر ہائی وے، فیصل ایونیو اور دیگر اہم شاہراہوں پر ٹریفک کی روانی برقرار رکھنے کے لیے مختلف مقامات پر عارضی ڈائیورشنز لگائی جائیں گی۔

یہ بھی پڑھیں: اسلام آباد: کشمیر چوک پر تعمیراتی کام کے باعث ٹریفک کے لیے متبادل راستوں کا اعلان

سری نگر ہائی وے پر ریڈ زون سے کورال تک مختلف مقامات پر ٹریفک کو متبادل راستوں کی جانب موڑا جائے گا۔

پولیس کے مطابق سری نگر ہائی وے استعمال کرنے والے شہری سہروردی روڈ، سروس روڈ جی 8 اور نائنتھ ایونیو کو متبادل راستے کے طور پر استعمال کریں۔

زیرو پوائنٹ سے کورال جانے والی ٹریفک نائنتھ ایونیو سے سفر کرے، جبکہ کورال سے اسلام آباد آنے والے شہری پرانے ایئرپورٹ، راول روڈ، راولپنڈی مری روڈ، آئی جے پی روڈ اور فقیر ایپی روڈ استعمال کریں۔

ٹریفک پولیس نے مزید بتایا کہ اگر کورال ایکسپریس ہائی وے، مری روڈ یا کلب روڈ بند کیے جاتے ہیں تو شہری لہتراڑ روڈ اور پارک روڈ کو متبادل راستوں کے طور پر استعمال کرسکتے ہیں۔

مزید پڑھیں: پی ٹی آئی احتجاج: اسلام آباد میں راستوں کی صورتحال کیا ہے؟

اسلام آباد سے شہر سے باہر جانے والے شہریوں کو جناح ایونیو اور مارگلہ روڈ استعمال کرنے کی ہدایت کی گئی ہے، جبکہ بہارہ کہو سے اسلام آباد آنے والے شہری بنی گالا اور پارک روڈ کے راستے اختیار کریں۔

اسلام آباد پولیس نے شہریوں کو خبردار کیا ہے کہ ڈائیورشنز کے دوران مختلف شاہراہوں پر ٹریفک کا دباؤ بڑھنے کا امکان ہے، اس لیے شہری اپنے سفر کے لیے معمول سے 20 سے 25 منٹ اضافی وقت رکھ کر گھروں سے نکلیں اور ٹریفک پولیس کی ہدایات پر عمل کریں۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp