پاکستان تحریک انصاف (پی ٹی آئی) کے اندر حکمت عملی اور قیادت کے کردار سے متعلق سوالات ایک بار پھر سامنے آگئے ہیں۔ پی ٹی آئی خیبرپختونخوا کے سیکریٹری اطلاعات شوکت یوسف زئی نے پارٹی کی موجودہ سیاسی حکمت عملی پر تنقید کرتے ہوئے کہا ہے کہ مزاحمتی سیاست نے پارٹی کو نقصان پہنچایا، اب عملی سیاست، مذاکرات اور اداروں کے ساتھ محاذ آرائی کا تاثر ختم کرنے کی ضرورت ہے۔
اپنے ویڈیو پیغام میں شوکت یوسف زئی نے کہاکہ 11 اکتوبر کے بعد پارٹی قیادت کی جانب سے اب تک کوئی واضح لائحہ عمل سامنے نہیں آیا۔ ان کے مطابق کارکن تذبذب کا شکار ہیں اور 11 اکتوبر کو بھی قیادت کی جانب سے آئندہ کے لائحہ عمل کا انتظار کرتے رہے، تاہم جن رہنماؤں نے پلان دینا تھا، وہ سامنے نہیں آئے۔
مزاحمتی سیاست نے پی ٹی آئی کو نقصان پہنچایا۔ 11 اکتوبر کے بعد سے کارکنوں کے خلاف بدترین کریک ڈاؤن جاری ہے اور گرفتاریاں ہو رہی ہیں۔ ہمیں مزاحمتی سیاست چھوڑ کر سنجیدہ سیاست کی طرف آنا ہوگا۔
پی ٹی آئی رہنما شوکت یوسفزئی کا ویڈیو بیان! https://t.co/Ij223CA7rM— WE News (@WENewsPk) October 18, 2026
شوکت یوسف زئی کے بیان کا اہم پہلو یہ ہے کہ انہوں نے کارکنوں کے خلاف کارروائیوں پر تحفظات کے ساتھ پارٹی کی اپنی حکمت عملی کو بھی تنقید کا نشانہ بنایا ہے۔ ان کا مؤقف ہے کہ محض مزاحمتی سیاست سے مطلوبہ نتائج حاصل نہیں ہوئے، اس لیے پارٹی کو احتجاج اور تصادم کے تاثر سے آگے بڑھ کر مذاکرات اور سیاسی نتائج کے حصول پر توجہ دینا ہوگی۔
انہوں نے کہاکہ پارٹی کو بند گلی سے نکالنے کے لیے بیرسٹر گوہر، سلمان اکرم راجا، اسد قیصر، عاطف خان اور علی محمد خان کو آگے آنا ہوگا۔ بیرسٹر گوہر کے کردار کو مثبت قرار دیتے ہوئے انہوں نے واضح کیاکہ موجودہ صورت حال میں پارٹی کو ایسی قیادت درکار ہے جو سیاسی حکمت عملی وضع کرنے اور کارکنوں کی بے یقینی دور کرنے میں مؤثر کردار ادا کرے۔
پی ٹی آئی رہنما نے سابق وزیراعلیٰ خیبرپختونخوا سہیل آفریدی، صوبائی صدر جنید اکبر اور اسپیکر صوبائی اسمبلی بابر سلیم سواتی کو عدالت میں پیش کرنے کا مطالبہ بھی کیا۔ ان کا کہنا تھا کہ ان تینوں کے بارے میں معلوم نہیں کہ وہ اس وقت کہاں ہیں۔
شوکت یوسف زئی نے کہاکہ انہوں نے پہلے ہی لانگ مارچ مؤخر کرکے مذاکرات کرنے کی تجویز دی تھی۔ ان کے مطابق اداروں کے ساتھ کوئی لڑائی نہیں، اس لیے محاذ آرائی کا تاثر زائل کرنا ضروری ہے۔ انہوں نے ملک کے دفاع کے لیے جانوں کا نذرانہ دینے والے فوجی اور پولیس اہلکاروں کو قابل فخر قرار دیا۔










