اسلام آباد کے مرکزی ہفتہ وار بازار بند، 27 ہزار خاندانوں کا روزگار داؤ پر لگ گیا

منگل 20 اکتوبر 2026
icon-facebook icon-twitter icon-whatsapp

وفاقی دارالحکومت اسلام آباد میں ہفتہ وار بازاروں کی بندش کے باعث ہزاروں دکاندار اور ان کے خاندان معاشی مشکلات سے دوچار ہیں۔ کیپٹل ڈیولپمنٹ اتھارٹی (سی ڈی اے) کی جانب سے آگ سے بچاؤ کے انتظامات ناکافی قرار دیے جانے کے بعد جی 6 اور ایچ 9 کے ہفتہ وار بازار بند کردیے گئے ہیں، جس کے نتیجے میں تقریباً 5 ہزار اسٹالز سے وابستہ 27 ہزار خاندانوں کا روزگار متاثر ہونے کا خدشہ پیدا ہوگیا ہے۔

بازاروں کی بندش کے خلاف دکاندار سراپا احتجاج ہیں۔ ان کا کہنا ہے کہ انتظامیہ کی ہدایات کے مطابق آگ بجھانے والے آلات، منظور شدہ سلنڈرز اور دیگر حفاظتی انتظامات اپنی جیب سے مکمل کیے گئے، لیکن اس کے باوجود بازار اچانک بند کردیے گئے۔

نوٹس کے بعد بازار بند، تاجروں کا احتجاج

تاجروں کے مطابق جمعرات کی رات بازاروں کی بندش کا نوٹس جاری کیا گیا، جس کے باعث جمعے کو بازار نہیں لگ سکا۔ اس کے بعد اتوار بازار بھی بند رہا، جبکہ منگل کو لگنے والا بازار بھی نہ کھل سکا۔ اس طرح بازاروں میں کاروبار کرنے والے دکاندار مسلسل کئی کاروباری دنوں سے آمدن سے محروم ہیں۔

تاجر رہنماؤں کا دعویٰ ہے کہ سی ڈی اے حکام نے وقتاً فوقتاً جن حفاظتی اقدامات کی نشاندہی کی، دکانداروں نے ان پر عملدرآمد کی کوشش کی۔ ان کے مطابق آگ بجھانے والے آلات، منظور شدہ سلنڈرز اور دیگر حفاظتی انتظامات پر اپنی جیب سے تقریباً ڈھائی کروڑ روپے خرچ کیے گئے، جس کے ثبوت بھی ان کے پاس موجود ہیں۔

تاجروں نے سوال اٹھایا کہ اگر حفاظتی انتظامات میں مزید کوئی کمی باقی تھی تو اسے دور کرنے کے لیے مناسب مہلت کیوں نہیں دی گئی؟ کاروبار مکمل طور پر بند کرنے سے پہلے کوئی قابلِ عمل متبادل راستہ کیوں اختیار نہیں کیا گیا؟

’گھروں میں فاقوں کی نوبت آ گئی‘

بازاروں کے باہر احتجاج کرنے والے دکانداروں کا کہنا ہے کہ ان کے پاس آمدن کا کوئی متبادل ذریعہ نہیں اور ہفتہ وار بازاروں میں کاروبار کے لیے ملنے والے محدود دنوں کی کمائی ہی ان کے گھروں کا چولہا جلانے کا واحد سہارا ہے۔

دکانداروں کے مطابق مہینے میں تقریباً 12 دن بازار لگتا ہے اور انہی دنوں کی آمدن سے وہ گھریلو اخراجات، بچوں کی ضروریات اور دیگر مالی ذمہ داریاں پوری کرتے ہیں۔ بازاروں کی بندش سے نہ صرف دکاندار بلکہ ان کے ساتھ کام کرنے والے مزدوروں اور دیگر افراد کا روزگار بھی متاثر ہورہا ہے۔

تاجروں کا کہنا ہے کہ جہلم سمیت مختلف علاقوں سے لوگ ان بازاروں میں خریداری کے لیے آتے ہیں، جہاں روزمرہ استعمال کی اشیا نسبتاً کم قیمت پر دستیاب ہوتی ہیں۔ ان کے دعوے کے مطابق ہر بازار میں تقریباً 70 سے 80 ہزار افراد کی آمدورفت ہوتی ہے، تاہم اس تعداد کی آزادانہ تصدیق نہیں ہوسکی۔

50 ہزار روپے کا پھل اور سبزیاں خراب ہونے کا دعویٰ

بازاروں کی بندش سے اشیائے خورونوش فروخت کرنے والے دکانداروں کو بھی بھاری نقصان کا سامنا ہے۔

ایک اسٹال ہولڈر نے بتایا کہ وہ گزشتہ 40 سال سے اس بازار میں اسٹال لگا رہے ہیں۔ ان کے مطابق جمعرات کی رات فروخت کے لیے تقریباً 50 ہزار روپے کے پھل اور سبزیاں منگوائی تھیں، تاہم بازار بند ہونے کے باعث سامان فروخت نہ ہوسکا اور خراب ہوگیا۔

دکانداروں کا کہنا ہے کہ تازہ پھلوں اور سبزیوں کی خریداری، نقل و حمل اور دیگر اخراجات برداشت کرنے کے بعد اگر سامان فروخت نہ ہو تو ان کا لگایا ہوا سرمایہ بھی ضائع ہوجاتا ہے۔

ان کے مطابق بازاروں کی مسلسل بندش سے روزانہ کی آمدن رک گئی ہے، جبکہ پہلے سے خریدا گیا سامان خراب ہونے کے باعث مالی نقصان میں مزید اضافہ ہورہا ہے۔

شہری سستی اشیائے ضروریہ کے لیے پریشان

ہفتہ وار بازار نہ صرف تاجروں کے لیے روزگار کا ذریعہ ہیں بلکہ کم آمدن والے اور متوسط طبقے کے شہریوں کو بھی نسبتاً سستی خریداری کی سہولت فراہم کرتے ہیں۔

شہریوں کا کہنا ہے کہ وہ کرایہ خرچ کرکے بار بار ان بازاروں کا رخ کررہے ہیں، لیکن بندش کے باعث انہیں مایوس واپس لوٹنا پڑتا ہے۔ ان کے مطابق عام مارکیٹوں میں پھلوں، سبزیوں اور دیگر اشیا کی قیمتیں زیادہ ہیں، جبکہ ہفتہ وار بازاروں میں یہی اشیا نسبتاً کم قیمت پر دستیاب ہوتی تھیں۔

شہریوں نے بتایا کہ ان بازاروں سے صرف پھل اور سبزیاں ہی نہیں بلکہ کپڑے، جوتے، گھریلو ضروریات کی اشیا اور جہیز کا سامان بھی مناسب قیمتوں پر خریدا جاتا ہے۔ ان کے مطابق بازاروں کی بندش سے ان کے ماہانہ گھریلو بجٹ پر بھی اضافی بوجھ پڑ گیا ہے۔

سی ڈی اے اور فائر حکام نے مؤقف دینے سے گریز کیا

ہفتہ وار بازاروں کی بندش اور تاجروں کے دعوؤں سے متعلق مؤقف جاننے کے لیے ’وی نیوز‘ نے سی ڈی اے حکام اور فائر بریگیڈ سے رابطہ کیا، تاہم متعلقہ حکام نے اس معاملے پر مؤقف دینے سے انکار کردیا۔

حکام کی جانب سے مؤقف سامنے نہ آنے کے باعث یہ سوالات تاحال جواب طلب ہیں کہ بازاروں میں آگ سے بچاؤ کے کون سے انتظامات ناکافی تھے، دکانداروں کی جانب سے کیے گئے حفاظتی اقدامات کا باقاعدہ جائزہ لیا گیا تھا یا نہیں، اور بازار دوبارہ کھولنے کے لیے کیا شرائط مقرر کی گئی ہیں۔

آگ سے بچاؤ کے انتظامات عوام کے تحفظ کے لیے بنیادی اہمیت رکھتے ہیں، تاہم تاجروں کا مطالبہ ہے کہ حفاظتی تقاضے پورے کرنے کے لیے انہیں واضح ہدایات اور مناسب مہلت فراہم کی جائے تاکہ کاروباری سرگرمیاں بھی بحال ہوسکیں اور شہریوں کو خریداری کے لیے محفوظ ماحول بھی میسر آسکے۔

روزگار اور عوامی ریلیف کا معاملہ

اسلام آباد کے ہفتہ وار بازاروں کی بندش اب محض ایک انتظامی کارروائی تک محدود نہیں رہی بلکہ ہزاروں خاندانوں کے روزگار اور شہریوں کو سستی اشیائے ضروریہ کی فراہمی کا ایک اہم مسئلہ بن چکی ہے۔

ایک جانب تاجر کاروبار کی بندش اور مالی نقصان کے خلاف احتجاج کررہے ہیں تو دوسری جانب شہری نسبتاً کم قیمت پر خریداری کی سہولت سے محروم ہوگئے ہیں۔ ایسے میں ضروری ہے کہ متعلقہ حکام آگ سے بچاؤ کے انتظامات پر اٹھائے گئے اعتراضات، دکانداروں کے دعوؤں اور بازاروں کی بحالی کے لائحہ عمل سے متعلق اپنا واضح مؤقف سامنے لائیں۔

اب سوال یہ ہے کہ کیا حفاظتی انتظامات میں موجود خامیوں کو دور کرنے کے لیے بازاروں کو مرحلہ وار کھولنے یا دکانداروں کو اصلاحات کے لیے مناسب مہلت دینے کا کوئی قابلِ عمل راستہ نکالا جاسکتا ہے، تاکہ عوام کے تحفظ کو بھی یقینی بنایا جاسکے اور ہزاروں خاندانوں کا روزگار بھی مزید متاثر ہونے سے بچایا جاسکے؟

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp