پاکستان اسٹاک ایکسچینج میں بدھ کے روز کاروبار کے آغاز پر تیزی کا رجحان برقرار رہا، جہاں انڈیکس 2,200 پوائنٹس سے زائد اضافے کے بعد 170 ہزار پوائنٹس کی سطح عبور کر گیا۔
سرمایہ کاروں کی توجہ امریکی وسط مدتی انتخابات کے نتائج اور امریکا ایران مذاکرات میں ممکنہ پیش رفت پر مرکوز رہی۔
یہ بھی پڑھیں: پاکستان اسٹاک مارکیٹ کی تاریخی بلندی کا ملک کی معیشت سے کتنا تعلق ہے؟
صبح 10 بج کر 40 منٹ پر بینچ مارک کے ایس ای 100 انڈیکس 2,216.64 پوائنٹس یعنی 1.32 فیصد اضافے کے بعد 170,235.50 پوائنٹس پر ٹریڈ کر رہا تھا۔
ماہرین کے مطابق مارکیٹ میں خریداری کا بڑا حصہ ادارہ جاتی سرمایہ کاروں، بالخصوص میوچل فنڈز، کی جانب سے آ رہا ہے، عالمی منڈی میں خام تیل کی قیمتیں تقریباً 103 ڈالر فی بیرل تک پہنچنے کے بعد مستحکم ہوئی ہیں، جس سے سرمایہ کاروں کے اعتماد میں بہتری آئی ہے۔
#KSE100 is showing early signs of a trend reversal, but the major confirmation is still pending.
The most important level now is 171.3–172k (200-DMA and descending resistance area).
A sustained breakout above this zone could open the way toward 175k and subsequently 178k. https://t.co/BTgjHd7jpN pic.twitter.com/g3XmVuUadR
— Farzooq Haider (@FarzooqHaider) November 4, 2026
انہوں نے مزید کہا کہ عالمی سطح پر امریکی انتخابات اور امریکا ایران مذاکرات اہم پیش رفت ہیں، امریکا کی جانب سے ایران کو مذاکرات کا مسودہ بھی ارسال کیا گیا ہے، جبکہ امریکی انتخابات کے ابتدائی غیر سرکاری نتائج میں ڈیموکریٹس کی پوزیشن مضبوط ہوتی دکھائی دے رہی ہے، ان عوامل نے مجموعی طور پر مارکیٹ کے مثبت رجحان کو سہارا دیا ہے۔
کاروبار کے دوران آٹوموبائل، سیمنٹ، کمرشل بینکنگ، تیل و گیس کی تلاش و پیداوار، آئل مارکیٹنگ کمپنیوں، بجلی پیدا کرنے والی کمپنیوں اور ریفائنریز کے شعبوں میں نمایاں خریداری دیکھی گئی۔
مزید پڑھیں: اسٹاک مارکیٹ میں زبردست تیزی، انڈیکس 1800 پوائنٹس بڑھ گیا
اٹک ریفائنری، حبکو پاور، ماری پیٹرولیم، آئل اینڈ گیس ڈیولپمنٹ کمپنی، پاکستان پیٹرولیم لمیٹڈ، پاکستان آئل فیلڈز، مسلم کمرشل بینک، میزان بینک، نیشنل بینک اور یونائیٹڈ بینک کے حصص بھی مثبت زون میں رہے۔
واضح رہے کہ منگل کے روز بھی پاکستان اسٹاک ایکسچینج میں تیزی دیکھی گئی تھی، جب کے ایس ای 100 انڈیکس 1,454.80 پوائنٹس یعنی 0.87 فیصد اضافے کے بعد 168,018.87 پوائنٹس پر بند ہوا تھا۔

دوسری جانب امریکی وسط مدتی انتخابات کے ابتدائی نتائج کے باعث عالمی مالیاتی منڈیوں میں محتاط رویہ دیکھا گیا۔
امریکی اسٹاک فیوچرز میں ایس اینڈ پی 500 کے فیوچرز 0.8 فیصد اور نیسڈیک کے فیوچرز 1.8 فیصد گر گئے، جبکہ امریکی 10 سالہ ٹریژری بانڈز کی ییلڈ 6 بیسس پوائنٹس کمی کے بعد 4.906 فیصد پر آ گئی۔
مزید پڑھیں: اسٹاک مارکیٹ میں مثبت رجحان، انڈیکس میں 950 پوائنٹس سے زائد اضافہ
ایشیا کی اسٹاک مارکیٹوں میں بھی ابتدائی تیزی کے بعد مندی غالب آ گئی۔ ایم ایس سی آئی ایشیا پیسیفک انڈیکس 0.5 فیصد، جنوبی کوریا کا کوسپی 1.6 فیصد اور جاپان کا نِکّی انڈیکس 3 فیصد گر گیا۔
اس کے باوجود امریکی چپ ساز کمپنی اے ایم ڈی کے توقعات سے بہتر مالیاتی نتائج نے مصنوعی ذہانت کے شعبے میں سرمایہ کاری کے مستقبل سے متعلق بعض خدشات کم کرنے میں مدد دی۔










