پاکستان سپر لیگ (پی ایس ایل) سیزن 9 کے لیے لاہور کی نیشنل کرکٹ اکیڈمی میں 13 دسمبر کو ہونے والے کے لیے 22 ممالک کے 485 بین الاقوامی کھلاڑیوں نے رجسٹریشن کروالی۔
پی ایس ایل 13 فروری تا 18 مارچ منعقد ہوگا۔ 46 کھلاڑی پلاٹینم کیٹیگری میں ہیں جبکہ 76 کھلاڑی ڈائمنڈ کیٹیگری میں شامل ہیں۔
ڈرافٹ کے لیے غیر ملکی کھلاڑیوں کے روسٹر کو انگلینڈ کے ڈیوڈ مالان اور جنوبی افریقہ کے ریزا ہینڈرکس کی موجودگی سے تقویت ملی ہے۔ یہ دونوں ہی بیٹسمین آئی سی سی ٹی ٹوئنٹی پلیئر رینکنگ کے ٹاپ 10 میں شامل ہیں۔ ٹی ٹوئنٹی کے ٹاپ پانچویں بلے باز ریلی روسو ملتان سلطانز سے کوئٹہ گلیڈی ایٹرز میں شامل ہوئے تھے۔
سری لنکا کے اسپنر مہیش تھیکشنا، افغانستان کی جوڑی فضل الحق فاروقی اور مجیب الرحمان اور ویسٹ انڈیز کے لیفٹ آرم اسپنر عقیل حسین بھی ڈرافٹ کے لیے دستیاب ہیں۔ ٹی ٹوئنٹی رینکنگ میں 12 ویں نمبر پر آل راؤنڈر محمد نبی بھی ڈرافٹ کا حصہ ہیں۔
کسی بیرونی ملک سے رجسٹر کرنے والے کھلاڑیوں کی زیادہ سے زیادہ تعداد انگلینڈ سے ہے جو کہ 158 ہے۔ فہرست میں ویسٹ انڈیز (58)، سری لنکا (40)، افغانستان (36)، جنوبی افریقہ (30)، بنگلہ دیش (21)، نیوزی لینڈ (18)، آسٹریلیا (16)، زمبابوے (11) اور آئرلینڈ کے 9 کھلاڑی ہیں جبکہ ایسوسی ایٹ ممبر ممالک سے بھی کافی تعداد میں کھلاڑیوں نے رجسٹریشن کرائی ہے۔
پلاٹینم کیٹیگری کے کچھ نمایاں کھلاڑیوں میں ڈینیل سامس، ایشٹن آگر (آسٹریلیا)، فضل الحق فاروقی، مجیب الرحمان، نور احمد، رحمن اللہ گرباز (افغانستان)، بین ڈکٹ، کرس جارڈن، ڈیوڈ ولی، ڈیوڈ ملان، لیوک ووڈ، ریس ٹوپلی، ٹام کرن، ٹمل ملز (انگلینڈ)، سندیپ لامچھانے (نیپال)، جیمز نیشم (نیوزی لینڈ)، رسی وین ڈیر ڈوسن، عمران طاہر (جنوبی افریقہ)، مہیش تھیکشنا، بھانوکا راجا پاکسا، داسن شاناکا (سری لنکا)، کیرون پولارڈ، روومین پاول، روماریو شیفرڈ، برینڈن کنگ اور کائل میئرز (ویسٹ انڈیز) شامل ہیں۔
