عوامی نیشنل پارٹی (اے این پی) کے رہنما ایمل ولی خان کے خلاف پشاور ہائیکورٹ میں توہین عدالت دائر کر دی گئی، توہین عدالت کی درخواست پاکستان تحریک انصاف (پی ٹی آئی) کے سابق ممبر قومی اسمبلی فضل محمد خان نے دائر کی۔
پاکستان تحریک انصاف سے تعلق رکھنے والے سابق ممبر قومی اسمبلی فضل محمد خان نے توہین عدالت کی درخواست میں موقف اختیار کیا کہ ایمل ولی خان ایک سیاسی جماعت اے این پی کے صوبائی صدر ہیں، ایمل ولی خان نے انٹرویوں کے دوران چیف جسٹس پشاور ہائیکورٹ کے خلاف غیر شائستہ الفاظ کا استعمال کیا ہے۔
مزید پڑھیں
انہوں نے موقف اختیار کیا کہ ایمل ولی خان نے اپنے سوشل میڈیا اکاؤنٹ ایکس پر بھی چیف جسٹس پر بے بنیاد الزامات لگائے، ایمل ولی خان نے نہ صرف الزامات لگائے، انہوں نے چیف جسٹس کو دھمکی بھی دی۔ ایمل ولی خان نے عدلیہ کو دباؤں میں لانے کی کوشش کی ہے۔
پشاور ہائیکورٹ میں دائر کردہ درخواست میں استدعا کی گئی ہے کہ ایمل ولی خان توہین عدالت کے مرتکب ہوئے ہیں ان کے خلاف کارروائی کی جائے۔
واضح رہے توہین درخواست پی ٹی آئی کے سابق ایم این اے فضل محمد خان نے بیرسٹر سروس شاہ کی وساطت سے دائر کی۔
I am sharing with my nation to set the record straight that the Chief Justice of Peshawar High Court threatened to end my political career. This behavior is unacceptable from a position of responsibility. I demand a public apology or resignation on behalf of the Awami National…
— Aimal Wali Khan (@AimalWali) December 21, 2023
یاد رہے چند روز قبل ایمل ولی خان نے پشاور ہائیکورٹ کے چیف جسٹس کے خلاف سوشل میڈیا پلیٹ فارم ایکس پر پوسٹ کرتے ہوئے سخت الفاظ لکھے تھے، انہوں نے چیف جسٹس پشاور ہائیکورٹ کو قوم سے معافی مانگنے کا مطالبہ کیا تھا۔ انہوں نے الزام عائد کیا کہ پشاور ہائیکورٹ کے چیف جسٹس میرے سیاسی کیریئر کو ختم کرنے کے لیے کرسی کا سہارا لے رہے ہیں۔
