2 روز میں جھوٹ کے بڑے بڑے بُت ٹوٹ گئے، اکبر ایس بابر

پاکستان تحریک انصاف کے بانی رکن اکبر ایس بابر نے سپریم کورٹ کی جانب سے بلے کا نشان واپس لیے جانے سے متعلق پی ٹی آئی کی درخواست کیخلاف الیکشن کمیشن کے فیصلے کو درست قرار دیے جانے کے بعد میڈیا سے گفتگو کرتے ہوئے کہا ہے کہ پاکستان کو تجدید نو کی ضرورت ہے، ایسا نظام جس میں امید ہو، جس میں باصلاحیت لوگ لیڈر شپ رول میں آسکیں۔

 اکبر ایس بابر کا کہنا تھا کہ گزشتہ 2 روز میں جھوٹ کے بڑے بڑے بت ٹوٹے ہیں، 2011 میں ہم نے جو مہم شروع کی، اس میں پہلے فارن فنڈنگ کیس میں اللہ نے سرخرو کیا اور اب انٹرا پارٹی الیکشن میں بھی سرخرو کیا،آج سچائی سامنے آئی ہے۔

انہوں نے کہاکہ اس کیس کے فیصلے سے جمہوری عمل اب مزید آگے بڑھے گا۔ تمام سیاسی جماعتوں کو اب اس عمل میں شامل ہونا پڑے گا۔ قیادت کا انتخاب پارٹی کے کارکنوں کا حق تھا۔

واضح رہے کہ سپریم کورٹ آف پاکستان نے الیکشن کمیشن آف پاکستان کے فیصلے کو درست قرار دیتے ہوئے پی ٹی آئی سے بلے کا نشان واپس لیے لیا ہے۔

اِس سے قبل پشاور ہائیکورٹ نے الیکشن کمیشن آف پاکستان کا فیصلہ معطل کرتے ہوئے پی ٹی آئی کو بلے کا نشان واپس کر دیا تھا۔

یہ بھی یاد رہے کہ الیکشن کمیشن آف پاکستان نے 22 دسمبر کو پی ٹی آئی کے انٹراپارٹی انتخابات کالعدم قرار دیتے ہوئے پی ٹی آئی سے بلے کا نشان واپس لے لیا تھا۔