صدر پاکستان مسلم لیگ ن شہباز شریف نے کہا کہ کل ایک سیاسی لیڈر نے نواز شریف کو مناظرے کا چیلنج دیا، میں اس لیڈر کو کہنا چاہتا ہوں کہ وہ نواز شریف کو اپنے صوبے میں آنے کی دعوت دیں، وہاں صوبے کا معائنہ کریں گے، موازنہ بھی ہو جائے گا اور مناظرہ بھی ہوگا اور آپ کو پتا بھی لگ جائے گا۔
راولپنڈی کے لیاقت باغ میں جلسے سے خطاب کرتے ہوئے صدر مسلم لیگ ن شہباز شریف نے کہا کہ نواز شریف نے جو وعدے کیے پورے کیے، نواز شریف کو موقع ملا تو راولپنڈی میں بلیو ٹرین چلائیں گے۔ پبلک ٹرانسپورٹ اور سڑکوں کی حالت بہتر کریں گے۔
پاکستان مسلم لیگ (ن) کا راولپنڈی لیاقت باغ میں عظیم الشان جلسہ۔ https://t.co/GmWU7uzGOA
— PMLN (@pmln_org) January 27, 2024
شہباز شریف نے کہا کہ فاطمہ جناح یونیورسٹی نواز شریف نے بنائی، کارڈیالوجی اسپتال بھی نواز شریف نے بنایا جس میں کشمیر اور گلگت بلتستان کے لوگ علاج کے لیے آتے ہیں۔ رنگ روڈ راولپنڈی کے لیے بہت بڑا تحفہ ہے اس کو جلد مکمل کیا جائے گا۔
انہوں نے کہا کہ نواز شریف نے نوجوانوں کو لیپ ٹاپ دیا لیکن انہوں نے گالم گلوچ کے سوا عوام کو کچھ نہیں دیا، راولپنڈی کے لیے 30 ارب روپے کا پانی کا منصوبہ لا رہے ہیں۔ نواز شریف نے پہلے بھی راولپنڈی کی عوام کو مایوس نہیں کیا اب بھی نہیں کریں گے۔
Related Posts
ان کا کہنا تھا کہ 8 فروری کو فیصلہ ہونا ہے کہ کس نے پاکستان کی خدمت کی اور کس نے پاکستان کی عوام کو دھوکا دیا، آپ سے مطالبہ ہے کہ 8 فروری کو ہیر پھیر کو نہیں دل کی آواز کو ووٹ دینا ہے۔
واضح رہے چیئرمین پیپلز پارٹی اپنی انتخابی مہم میں مسلسل نواز شریف کو تنقید کا نشانہ بنا رہے ہیں اور مناظرہ کا چیلنج بھی کر رہے ہیں جس کے جواب میں شہباز شریف نے چیلنج قبول کر لیا۔