محکمہ داخلہ پنجاب کی جانب سے اڈیالہ جیل میں قیدیوں کے ساتھ ملاقاتوں پر پابندی کے حوالے سے جاری ہونے والا مراسلہ سامنے آ گیا ہے۔
آئی جی جیل خانہ جات کو جیل میں ہر قسم کی ملاقاتوں پر پابندی لگانے کا حکم دیا گیا ہے۔
محکمہ داخلہ کے مطابق اڈیالہ جیل میں ملاقاتوں پر پابندی کا فیصلہ دہشتگرد حملے کی مبینہ اطلاع کے باعث کیا گیا ہے۔
مراسلے کے مطابق محکمہ داخلہ کا کہنا ہے کہ غیر ملکی دہشتگرد عناصر اڈیالہ جیل پر حملہ کرنے کی منصوبہ بندی کر رہے ہیں۔
محکمہ داخلہ کی جانب سے اڈیالہ جیل میں ملاقاتوں، دوروں اور انٹرویوز پر 2 ہفتوں کے لیے پابندی لگائی گئی ہے۔
دوسری جانب پنجاب کی وزیر اطلاعات عظمیٰ بخاری نے کہا ہے کہ اڈیالہ جیل میں ملاقاتوں پر پابندی سیکیورٹی کی بنیاد پر لگائی گئی ہے۔ پی ٹی آئی ہمیشہ ہر بات میں سازشی تھیوری تلاش کر رہی ہوتی ہے۔
