23 مارچ یوم پاکستان کے موقع پر مختلف شعبوں میں نمایاں خدمات انجام دینے والی شخصیات کو سول اعزازات سے نوازا گیا ہے۔
ایوان صدر اسلام آباد میں ہونے والی تقریب میں صدر مملکت آصف علی زرداری نے سول اعزازات تقسیم کیے جبکہ چاروں صوبوں میں گورنرز نے اعزازات تقسیم کرنے کی ذمہ داری نبھائی۔
اس موقع پر کپتان چپل سے مشہور ہونے والے چاچا نوردین کو بھی سول ایوارڈ برائے حسن کارکردگی سے نوازا گیا، انہوں نے گورنر خیبرپختونخوا حاجی غلام علی سے ایوارڈ وصول کیا۔
مزید پڑھیں
چاچا نور دین خیبرپختونخوا کے شہر پشاور سے تعلق رکھتے ہیں اور اپنے ہنر کی بدولت انہوں نے لوگوں کی توجہ اپنی جانب سمیٹ لی ہے۔
چاچا نور دین نے حال ہی میں سابق وزیراعظم عمران خان کے لیے ایک چپل تیار کی ہے جس کا نام قیدی نمبر 804 رکھا گیا ہے۔
چاچا نور دین نے اس چپل کی قیمت 25 ہزار روپے بتائی جبکہ عوام کے لیے کم قیمت میں ایسی ہی چپل بنانے کا بھی اعلان کیا۔
چاچا نوردین کپتان چپل عمران خان کو تحفہ میں دینے کے خواہشمند
کچھ روز قبل وی نیوز سے گفتگو کرتے ہوئے چچا نوردین کا کہنا تھا کہ انہوں نے بہت محنت کر کے 25 ہزار روپے کی لاگت سے چپل کی یہ جوڑی تیار کی ہے اور وہ عمران خان کی رہائی کے بعد انہیں یہ چپل تحفے کے طور پر پیش کرنا چاہتے ہیں۔
چچا نوردین کا کہنا تھا کہ انہیں 3 ماہ پہلے خیال آیا تھا کہ اس بار عمران خان کو چپل کا نایاب تحفہ پیش کریں گے تاہم جیل سے رہائی نہ ملنے کے باعث انہوں نے عمران خان کی محبت میں قیدی نمبر 804 کے نام پر چپل تیار کی۔
