بالی ووڈ میں اپنے کرداروں کی وجہ سے شہر ت پانے والی تاپسی پانو بھی آخر کار پیا گھر سدھار گئیں۔ اداکارہ گزشتہ کئی دنوں سے اپنے دیرینہ بوائے فرینڈ میتھیاس بو کے ساتھ شادی کی خبروں کی وجہ سے سرخیوں میں تھیں۔ گزشتہ 10 سالوں سے ایک دوسرے کو ڈیٹ کررہے تھے اوریہ جوڑا مارچ کے مہینے میں شادی کرنے والا تھا لیکن کسی کو حتمی تاریخ کا پتہ نہیں تھا۔ اب اچانک میڈیا میں خبریں آئیں کہ تاپسی پانو اور میتھیاس بو میاں بیوی بن چکے ہیں۔
یہ جوڑا بالی ووڈ کے پسندیدہ ویڈنگ ڈیسٹی نیشن ادے پور میں شادی کے بندھن میں بندھا۔ اداکارہ تاپسی پانو اور سابق اولمپک میڈلسٹ میتھیاس بو نے خاندان اور قریبی دوستوں کی موجودگی میں شادی کی۔ ذرائع نے انکشاف کیا کہ شادی ادے پور میں ہوئی تھی اور یہ کافی ذاتی پروگرام تھا۔
شادی سے پہلے کی تقریبات 20 مارچ کو شروع ہوئی تھیں۔ یہ جوڑا اپنی شادی میں میڈیا کی توجہ نہیں چاہتا تھا۔ یہ دونوں ان لوگوں میں شامل ہیں جو میڈیا اور لائم لائٹ سے دور رہتے ہیں۔ بالی ووڈ کے مشہور چہروں نے بھی تاپسی پنو کی شادی میں شرکت نہیں کی۔ اداکارہ نے انڈسٹری سے صرف اپنے قریبی دوستوں انوراگ کشیپ اور کنیکا ڈھلوں کو مدعو کیا تھا۔
