رمضان کا مبارک مہینہ تقریباً آدھا بیت چکا ہے اور عوام زور و شور سے عید کی تیاریوں میں مگن ہیں، ہر دوسرے شخص کی یہی کوشش ہے کہ اسے اچھے برانڈڈ مگر سیل کے کپڑے مل جائے تو اس کی عید کی شاپنگ کا مزہ ہی دوبالا ہو جائے، خاص طور پر خواتین ہمیشہ اسی کھوج میں رہتی ہیں کہ ان کا 10 سے 12 ہزار روپے مالیت کا پسندیدہ جوڑا سیل میں کم قیمت پر مل جائے۔
عید جیسے تہواروں کے موقعوں پر ملبوسات پر اس نوعیت کی سیل کم ہی دیکھنے کو ملتی ہے، باوجود اس کے ہر دوسرا فرد سیل کی کھوج میں ہوتا ہے، اسی حوالے سے وی نیوز نے چند ایسے برانڈز دریافت کیے ہیں جہاں خریدار عید کی ’سیل‘ سے استفادہ کرسکتے ہیں۔
گل احمد
پاکستانی برانڈ گل احمد کی سیزن کی اختتامی سیل ابھی جاری ہے، خواتین خریداروں سمیت مرد حضرات بھی دیدہ زیب کپڑے 50 فیصد تک ڈسکاؤنٹ پر خرید سکتے ہیں۔
بونینزا ست رنگی
بوننزا ست رنگی واحد برانڈ ہے جس نے اپنی عید کلیکشن پر 10 فیصد سیل کا اعلان کررکھا ہے ورنہ بونینزا کی سیزن کے اختتامی سیل ختم ہو چکی ہے، یہاں سے خواتین و حضرات دونوں ہی ریڈی میڈ لباس یا پھر کپڑا لے کر درزی سے سلوا سکتےہیں۔
جے ڈاٹ
جنید جمشید برانڈ کی سیزن کی آخری سیل ابھی تک جاری ہے لیکن اس سیل کی خاص بات یہ ہے کہ اس کے کچھ گرمیوں میں پہنے جانے والے آرٹیکلز اب بھی دستیاب ہیں مگر یہ سیل صرف آن لائن دستیاب ہے۔
الماس
الماس اسٹور کا شمار اپنے جوتوں اور مغربی کپڑوں کے حوالے سے اچھے برانڈز میں ہوتا ہے، یہاں الماس کے اپنے بنائے ہوئے جوتوں کے جوڑوں پر تقریباً 40 فیصد تک سیل ابھی تک جاری ہے۔
کھاڈی
پاکستان کی پہچان کپڑوں کا مشہور برانڈ کھاڈی پر بھی آن لائن سیل جاری ہے جبکہ کھاڈی اسٹور پر بھی 40 فیصد تک ریڈی میڈ اور بغیر سلے کپڑوں پر سیل ہے، پاکستان سے میکسیکو تک مقبول اس برانڈ کی ہوم ایکسیسریز اور محدود پیمانے پر جیولری بھی دستیاب ہے۔
لائم لائٹ
لائم لائٹ بھی اپنے ممکنہ خریداروں کو تمام آئٹمز پر آن لائن سیل کی دعوت دے رہا ہے، یہاں بھی 40 فیصد تک کی سیل خواتین، مردوں، بچوں، جیولری، بیگز، کاسمیٹیکس وغیرہ پر ہے۔
