بھارت میں دنیا کا سب سے بڑا سانپ دریافت

بھارت میں سائنسدانوں نے دنیا کے اب تک کے سب سے بڑے سانپ کی باقیات دریافت کی ہیں۔

غیرملکی میڈیا رپورٹس کے مطابق، تقریباً 15 میٹر (50 فٹ) لمبے اس سانپ کو بھارتی ریاست گجرات میں ایک لگنائٹ کی کان سے دریافت کیا گیا۔ ماہرین کا کہنا ہے کہ یہ سانپ 47 ملین سال قبل اس خطے میں پایا جاتا تھا۔

اترکھنڈ میں قائم انڈین اسنٹیٹیوٹ آف ٹیکنالوجی کے ماہرین نے اس سانپ کی باقیات سے ملنے والی سانپ کی ریڑھ کی ہڈی کے 27 جوڑوں کی مدد سے اس سانپ کی لمبائی کا اندازہ لگایا ہے۔ سائنسدانوں کا کہنا ہے کہ اس سانپ کی لمبائی 11 سے 15 میٹر یا ایک اسکول بس کی لمبائی جتنی ہوسکتی ہے۔

سائنسدانوں نے اس سانپ کو ہندو دیوتا شیو کی گردن میں مالا کی طرح لٹکے افسانوی سانپ ’کنگ واسوکی‘ سے تشبیہ دیتے ہوئے اسے ’واسوکی انڈیکس‘ کا نام دیا ہے۔

سائسندانوں نے خیال ظاہر کیا ہے کہ زمانہ قدیم میں زندہ رہنے والا یہ سانپ افریقہ، یورپ اور انڈیا کے دلدلی علاقوں کے قریب رہتا ہوگا، اس کا وزن ایک ہزار کلوگرام تک ہوگا، اس کے رینگنے کی رفتار کم ہوگی جس کی وجہ سے یہ ایناکونڈا کی طرز پر اچانک اپنے شکار پر حملہ آور ہوتا ہوگا۔