خیبر پختونخوا کے ضلع لکی مروت میں شادی کی تقریب کے سلسلہ میں منعقدہ محفل موسیقی کے دوران فائرنگ سے 6 افراد ہلاک جبکہ ایک شخص زخمی ہو گیا ہے۔
لکی مروت پولیس نے جان لیوا فائرنگ کی تصدیق کرکے بتایا کہ واقعہ تھانہ غزنی خیل کی حدود آگری خانزاد خیل کے علاقے میں پیش آیا ہے، جہاں ایک گھر میں شادی تھی اور رات کے وقت موسیقی کی محفل میں پورے علاقے سے لوگ شریک تھے۔
مزید پڑھیں
پولیس کے مطابق علاقائی روایت کے مطابق موسیقی کی تقریب میں کسی کو دعوت نہیں دی جاتی بلکہ لوگ خود شریک ہوتے ہیں یہی وجہ ہے کہ اس تقریب میں بھی کافی بڑی تعداد میں اہل علاقہ موجود تھے، رات گئے موسیقی کی تقریب میں علاقے کے دو مخالف گروپس کا امنا سامنا ہوا۔ جس کے درمیان کافی عرصے دشمنی چلی آرہی تھی۔
غزنی خیل پولیس کے مطابق دونوں گروپوں سے وابستہ افراد اشتہاری بھی تھے جبکہ تقریب میں آمنے سامنے آنے کے بعد دونوں فریقین نے ایک دوسرے پر فائرنگ کر دی، جس سے تقریب میں بھگدڑ مچ گئی، اس فائرنگ کے واقع میں 6 افراد جان کی بازی ہار گئے اور ایک شخص زخمی ہوگیا، جسے فائرنگ کا سلسلہ رکنے کے بعد اسپتال منتقل کر دیا گیا۔
لکی مروت پولیس نے اس جان لیوا واقع کی مزید تفتیش شروع کر دی ہے، ہلاک شدگان میں میں 2 اشتہاری بھی شامل ہیں۔ پولیس نے بتایا کہ لواحقین کی جانب سے دعویداری کے بعد مقدمہ درج کیا جائے گا اور ایف آئی آر کے مطابق ہی ملزمان کی گرفتاری کے لیے پولیس کارروائی کرے گی۔
