کیمبرج انٹرنیشنل ایجوکیشن نے اے لیول کا پرچہ لیک ہونے کی تصدیق کرتے ہوئے تحقیقات کا آغاز کردیا۔
مزید پڑھیں
کیمبرج انٹرنیشنل ایجوکیشن (سی آئی ای) نے اپنے فیس بک کے آفیشل پیج پر جاری بیان میں اے لیول کا ایک پرچہ لیک ہونے اور اس ضمن میں اپنی جاری تحقیقات کی تصدیق کی ہے۔
اپنے بیان میں سی آئی ای نے کہا، ’ہم 2 مئی کو اے لیول کے ریاضی کے پرچہ نمبر 9709 پیپر 12 کے لیک ہونے سے متعلق خدشات کو دور کر رہے ہیں۔ اس معاملے کی تحقیقات کی جارہی ہیں اور کیمبرج اور برٹش کونسل کا اس ضمن میں قریبی رابطہ قائم ہے۔ ہم آپ کو اس حوالے سے کسی بھی نئی معلومات کے بارے میں آگاہ کریں گے تاہم فیس بک کمنٹس یا براہ راست پیغامات کے ذریعے مطلع نہیں کیا جائے گا۔‘
اپنے بیان میں کیمبرج انٹرنیشنل ایجوکیشن نے امتحانات میں شفافیت کو قائم رکھنے کے اپنے عزم کا اعادہ کیا اور کہا کہ وہ سی آئی ای امتحانات کے انعقاد کے ذمہ دار ادارے برٹش کونسل کے ساتھ مسلسل رابطے میں ہے۔
واضح رہے کہ گزشتہ روز اے لیول کا ریاضی کا پرچہ لیک ہونے کی اطلاعات سامنے آئی تھیں جس پر طلبہ نے سوشل میڈیا پر اپنے مستقبل کے حوالے سے خدشات کا اظہار کیا تھا۔ سی آئی ای کی جانب سے جاری بیان کے بعد واضح ہوگیا ہے کہ پرچہ لیک ہونے کی اطلاعات درست تھیں۔
