لاڈلوں کے فیصلے گھنٹوں میں آرہے ہیں، گورنر سندھ کی عدلیہ پر تنقید

گورنر سندھ کامران ٹیسوری نے کہا ہے کہ عدالتوں سے لاڈلوں کے فیصلے گھنٹوں میں آرہے ہیں، عدلیہ کو اپنے فیصلوں پر نظر ثانی کرنا ہوگی۔

بدھ کو پریس کانفرنس کرتے ہوئے گورنر سندھ نے کہاکہ ایسے ملکوں میں کون سرمایہ کاری کرے گا جہاں صبح شام فیصلے بدلتے ہوں، فیصلے آئین و قانون کے مطابق آنے چاہیئیں۔

انہوں نے کہاکہ عدلیہ کو ایسے فیصلے نہیں کرنے چاہیئیں جن پر 10 سال بعد ندامت ہو۔

کامران ٹیسوری نے کہاکہ عدلیہ کو خبروں کی زینت نہیں ہونا چاہیے بلکہ فیصلوں کی وجہ سے خبروں میں ہونا چاہیے۔

گورنر سندھ نے کہاکہ جس کا دل چاہتا ہے فوج اور اسٹیبلشمنٹ کو سیاست میں گھسیٹ لیتا ہے، لاڈلوں کے فیصلے گھنٹوں میں آرہے ہیں مگر عام عوام کے فیصلے نہیں آرہے۔

انہوں نے کہاکہ یہ وطن بڑی قربانیوں کے بعد ملا ہے، وقت آگیا ہے کہ ابھی نہیں تو کبھی نہیں، جو کرنا ہے ابھی کر ڈالو کیونکہ عوام معاشی بحران سے نکلنا چاہتے ہیں۔

انہوں نے کہاکہ جو بات کررہا ہوں بڑے وثوق اور لوگوں کی رائے لے کر کررہا ہوں۔ افتخار چوہدری اور ثاقب نثار کے فیصلوں پر آج تنقید ہورہی ہے۔