جج انصاف کے طلبگار ہیں، عوام کے حقوق کا تحفظ کیسے ہوگا، بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا کہ جج صاحبان جو خود دوسروں کو انصاف دیتے ہیں، اگر آج وہ خود انصاف کے طلبگار ہیں تو عوام کے حقوق کا تحفظ کیسے ہوگا۔

’عمران خان کیخلاف 203 جعلی مقدمات بنائے گئے‘

بیرسٹر گوہر خان نے کہا، ’عمران خان کے خلاف 203 مقدمات بنائے گئے، یہ سیاسی انتقام ہے اور یہ تمام مقدمات جعلی ہیں، اڈیالہ جیل میں ان کیسز میں 14، 14 گھنٹے ٹرائل ہورہا تھا، میں نے جج صاحب سے کہا کہ بریک کتنی دیر کی ہوگی تو جج صاحب نے کہا کہ اتنی ہی ہوگی کہ ہم نماز جمعہ پڑھ سکیں۔‘

چیئرمین پی ٹی آئی کا کہنا تھا انہی جج صاحبان نے 2 دن کے اندر دوران عدت نکاح کیس کا ٹرائل مکمل کرلیا تھا، ساڑھے 8 بجے شروع کیا، 11 بجے تک ٹرائل چلا، اگلے روز 9 بجے سماعت شروع کی اور 10، 10 منٹ کے وقفوں کے ساتھ رات پونے 12 بجے ٹرائل مکمل کرلیا۔

انہوں نے کہا کہ اگر ججز بنیادی اصولوں کو مدنظر نہ رکھتے ہوئے فیصلے کریں تو وہ انصاف نہیں بلکہ ناانصافی ہے، عمران خان سیاسی انتقام کی وجہ سے جیل میں ہیں، ہمارا ججز سے پرزور مطالبہ ہے کہ عمران خان کو جلد از جلد رہا کیا جائے۔

چیئرمین پی ٹی آئی نے کہا کہ بشریٰ بی بی کے خلاف بھی کوئی کیس نہیں، توشہ خانہ کے ریکارڈ میں بشریٰ بی بی کا کہیں نام نہیں ہے، ان کے نام کبھی کوئی گفٹ نہیں آیا اور نہ انہوں نے کبھی کوئی تحفہ قبول کیا، انہوں نے کسی گفٹ کے نہ پیسے دیے ہیں نہ لیے ہیں، انہوں نے کبھی ان گفٹس پر ٹیکس نہیں دیا تھا، کیبنیٹ ڈویژن، اسٹیٹ بینک سے آئے ریکارڈ اور الیکشن کمیشن دستاویزات میں بشریٰ بی بی کا نام نہیں تھا، صرف عمران خان کو پریشر میں لانے کے لیے یہ کیس بنایا گیا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں