ایشیا کے امیر ترین شخص بھارتی بزنس ٹائیکون مکیش امبانی کے بیٹے کی شادی کی تقریب میں دنیا کے چند بااثر اور نامورگلوکار پرفام کریں گے۔
بھارتی میڈیا رپورٹس کے مطابق اننت امبانی اور رادھیکا مرچنٹ کی شادی اب تک کی سب سے بڑی اور مہنگی ترین شادی ہونے والی ہے جس میں برطانوی گلوکارہ اڈیل، کینیڈین ریپر ڈریک اور امریکی گلوکارہ لانا ڈیل رے اور جسٹن بیبر پرفارم کریں گے۔
رپورٹس کے مطابق کینیڈین پاپ اسٹار جسٹن بیبر اننت امبانی اور رادھیکا مرچنٹ کی شاندار سنگیت تقریب میں پرفارم کرنے کے لیے بھارت آ چکے ہیں جو 5 جولائی بروز جمعہ کو منعقد ہوگی۔ اننت امبانی اور رادھیکا مرچنٹ کی شادی 12 جولائی کو ہو گی اور تقریبات کا سلسلہ چودہ جولائی تک جاری رہے گا۔
خیال رہے کہ امبانی خاندان کی جانب سے شادی کا 3 روزہ جشن رواں سال مارچ میں جام نگر میں منایا گیا تھا جس میں بالی وُڈ سمیت دنیا بھر کی نامور شخصیات نے شرکت کی تھی۔ اس کے علاوہ امبانی خاندان نے شادی کا دوسرا جشن 29 مئی سے یکم جون تک اٹلی اور جنوبی فرانس میں کروز پر منایا تھا۔ جبکہ اننت امبانی کی شادی سے قبل 50 غریب جوڑوں کی شادی بھی کرائی گئی۔
مکیش امبانی کتنی ملکیت کے مالک ہے؟
فوربز کے مطابق 66 سالہ مکیش امبانی اس وقت دنیا کے 10ویں امیر ترین آدمی ہیں جن کی مجموعی مالیت 115 ارب ڈالرز ہے، ریلائنس انڈسٹریز، جس کی بنیاد ان کے والد نے 1966 میں رکھی تھی، ایک بہت بڑا گروپ ہے جو ریفائننگ اور ریٹیل سے لے کر مالیاتی خدمات اور ٹیلی کام تک کے شعبوں میں کام کرتا ہے۔ اننت امبانی اپنے تین بہن بھائیوں میں سب سے چھوٹے ہیں، سبھی ریلائنس انڈسٹریز کے بورڈ میں شامل ہیں۔
