ملک بھر میں مون سون بارشوں کا سلسلہ جاری ہے، گزشتہ روز ملک کے بیشتر علاقوں میں شدید بارشوں کے ریکارڈ قائم ہوئے۔ لاہور میں بھی بارشوں کا 44 سالہ ریکارڈ ٹوٹ گیا، اہم شاہراہیں ندی نالوں کا منظر پیش کرنے لگیں، چھتیں گرنے کے 2واقعات میں ایک بچی جاں بحق اور 5افراد زخمی ہوگئے۔
لاہور میں مسلسل بارش کی وجہ سے لیسکو کے فیڈرز بھی ٹرپ کرگئے، بارش کے باعث نقصان سے بچنے کے لیے دفاتر اور اسکولوں کو بند کر دیا گیا۔ اعداد وشمار کے مطابق ائیرپورٹ پر 300ملی میٹر بارش نے تمام ریکارڈ توڑ دیے۔
مزید پڑھیں: خیبر پختونخوا میں بارشوں کے باعث ہلاکتوں کی تعداد 19 ہوگئی، پی ڈی ایم اے
دریں اثنا کمشنر لاہور نے رین ایمرجنسی نافذ کردی، دفاتر اور اسکولوں کے سمر کیمپس میں چھٹی کا اعلان کر دیا۔ کمشنر لاہور کے مطابق لاہور میں تمام آفسسز کو چھٹی کر دی گئی، بارش کے باعث نقصان سے بچنے کے لیے دفاتر اور اسکولوں کو بند کردیا گیا۔
وزیراعلیٰ پنجاب مریم نواز نے بھی لاہور سمیت دیگر شہروں میں پانی کی جلد نکاسی کا حکم دیدیا، وزیراعلیٰ پنجاب کی ہدایت پرمتعلقہ محکموں کے لیے الرٹ جاری کردیا گیا۔
لاہور میں مسلسل بارش کے باعث گلیاں، محلے اور سڑکیں تالاب بن گئی ہیں، شہریوں نے مختلف علاقوں سے ویڈیوز سوشل میڈیا پر شیئر کی ہیں جن میں یہ مناظر باآسانی دیکھے جاسکتے ہیں۔
ایک صارف بیرسٹر سدرہ قیوم نے لکھا کہ لاہور میں ہنگامی صورتحال ہے متعدد انڈر پاسز پانی سے بھرے ہوئے۔ گلیوں میں اتنا پانی ہے کہ باہر نہیں نکلا جاسکتا اور بارش ابھی بھی جاری ہے بجلی کئی گھنٹوں سے غائب ہے۔
لاہور میں ہنگامی صورتحال ہے متعدد انڈر پاسز پانی سے بھرے ہوئے۔ گلیوں میں اتنا پانی ہے کہ باہر نہیں نکلا جاسکتا اور بارش ابھی بھی جاری ہے بجلی کئی گھنٹوں سے غائب ہے۔#Lahore #rain pic.twitter.com/Z8ny5D24iA
— Barister Sidra Qayyum (@Shr_9998) August 1, 2024
ایک اور صارف نے لکھا کہ لاہور کے سروس اسپتال کے بعد حاضر ہے جنرل اسپتال، لاہور شہر ڈوب چکا ہے، او شہری خوار ہوچکے ہیں۔
لاہور کے سروس اسپتال کے بعد حاضر ہے جنرل اسپتال،، لاہور شہر ڈوب چکا ہے ،، شہری خوار،#Lahore pic.twitter.com/4CkCQzTd8J
— phirki Am (@AmPhirki) August 1, 2024
ایک صارف نے لکھا کہ صبح سویرے دفتر کے لیے روانہ ہوا، فیروز پور روڈ پر کاہنہ سے مزنگ تک بہت زیادہ پانی تھا، یہاں تک کہ بسوں میں بھی پانی گھس گیا۔
Left early morning for office, a lot of water on Ferozpur Road from Kahna to Mozang (mostly). Even Entered into buses. #Lahore #rainyseason pic.twitter.com/Xp8rjMKQaM
— Amjad Chudhary (Historian) (@AZChudhary) August 1, 2024
گاڑیوں کی مشہور ویب سائٹ پاک ویلز نے بھی اپنے سوشل میڈیا پر لاہور میں بارش کے بعد کے مناظر کی ویڈیوز شیئر کی ہے۔
دوسری جانب محکمہ موسمیات نے یکم اگست سے 6 اگست تک ملک میں شدید مون سون بارشوں کی پیشگوئی کی ہے۔ اعلامیے کے مطابق 31 جولائی تا 6اگست کشمیر، مظفر آباد میں تیز ہواؤں اور گرج چمک کے ساتھ موسلا دھار بارش اورژالہ باری کا امکان ہے۔
اسلام آباد، سرگودھا سمیت مختلف علاقوں میں گرج چمک کے ساتھ بارش اور کئی مقامات پرطوفانی بارش بھی متوقع ہے۔ موسلادھاربارش سےاسلام آباد، راولپنڈی سمیت مختلف علاقوں میں پہاڑوں، ندی نالوں میں سیلابی صورتحال کا خدشہ ہے۔
یہ بھی پڑھیں: ملک بھر میں بارشیں: مختلف حادثات میں 31 افراد جاں بحق، راولپنڈی اسلام آباد میں رین ایمرجنسی نافذ
محکمہ موسمیات کے مطابق 3 اگست سے 5 اگست تک خیبرپختخونخوا کے پہاڑی علاقوں، مری، گلیات، بلوچستان میں لینڈ سلائیڈنگ کا خدشہ ہے، شدید بارش آندھی اور گرج چمک کے باعث کمزور انفرا اسٹرکچر کو نقصان پہنچنے کا خدشہ ہے۔
اعلامیے کے مطابق 2 اگست سے 6 اگست کے دوران بہاولپور بہاول نگر ڈیرہ غازی خان میں تیز ہوا گرج چمک کے ساتھ موسلا دھار بارشیں متوقع ہے، یکم اگست سے 6 اگست تک چترال، دیر، سوات، صوابی میں گرج چمک کے ساتھ موسلا دھار بارشوں کی توقع ہے۔