پاکستانی شوبز انڈسٹری کے معروف اداکار فردوس جمال نے سُپر اسٹار ماہرہ خان کو ’بوڑھی عورت‘ اور ہمایوں سعید کو ’ڈاکو‘ قرار دے دیا۔ حال ہی میں فردوس جمال نے نجی ٹی وی چینل کے پروگرام میں بطورِ مہمان شرکت کی جہاں اُن سے اداکارہ ماہرہ خان اور ہمایوں سعید سے متعلق سوال پوچھے گئے۔
پروگرام کے میزبان نے فردوس جمال سے پوچھا کہ آپ نے ماضی میں کہا تھا کہ ماہرہ خان بوڑھی لگتی ہیں، اُنہیں ہیروئن کے نہیں بلکہ ماں کے کردار دینے چاہیے لیکن آپ کے بیان کے بعد ماہرہ خان نے سُپر ہٹ فلم ’دی لیجنڈ آف مولا جٹ‘ میں شاندار اداکاری کے جوہر دکھائے اس پر آپ کیا کہنا چاہیں گے؟
اس سوال کے جواب میں فردوس جمال نے کہا کہ وہ آج بھی اپنے بیان پر قائم ہیں اور انہوں نے ماہرہ خان کی عمر سے متعلق حقیقت بتائی ہے کیونکہ وہ اپنی اصل عُمر کے مطابق بوڑھی عورت ہی ہیں۔ میزبان نے اداکار سے کہا کہ پاکستان کے 90 فیصد لوگوں کو ماہرہ خان خوبصورت نظر آتی ہیں، جس پر فردوس جمال نے کہا کہ اگر 90 فیصد لوگ پاگل ہیں تو کیا وہ بھی اُن کی طرح پاگل بن جائیں۔
میزبان نے فردوس جمال سے ہمایوں سعید سے متعلق سوال کیا کہ وہ اس وقت مہنگے ترین اداکار ہیں لیکن آپ کے بقول انہیں اداکاری نہیں آتی؟ جس پر فردوس جمال نے طوائف کی مثال دیتے ہوئے کہا کہ لازمی نہیں جو زیادہ معاوضہ وصول کرے وہ بہترین اداکار بھی ہو کیونکہ زیادہ پیسہ تو طوائف بھی لیتی ہیں۔
فردوس جمال کے مطابق اداکار ہمایوں سعید اداکاری میں ڈاکہ ڈال رہے ہیں کیونکہ قدرت ہمایوں سعید کے ساتھ ہے، انہیں بہترین وسائل ملے اور مناسب پلیٹ فارم ملا جس کو وہ کیش کررہے ہیں یہاں تک کہ وہ اپنے سے اچھے اداکاروں کو انڈسٹری میں آنے کا موقع تک نہیں دیتے۔
واضح رہے کہ سال 2019 میں فردوس خان نے اپنے ایک بیان میں کہا تھا کہ انہیں نہیں لگتا ماہرہ خان کو اب ہیروئن کے کردار ادا کرنے چاہیئں۔ ماہرہ خان ماڈل ہوسکتی ہیں لیکن وہ نہ تو ایک اچھی اداکارہ ہیں اور نہ ہی ہیروئن۔ فردوس جمال نے ماہرہ خان کی عمر پر بات کرتے ہوئے کہا تھا کہ ماہرہ کی عمر زیادہ ہوگئی ہے اور اس عمر میں ہیروئنیں نہیں ہوتیں بلکہ ماں کے کردار کیے جاتے ہیں۔
