امیر بالاج ٹیپو کے قتل کیس کا مرکزی ملزم احسن شاہ مبینہ مقابلے میں مارا گیا۔
یہ بھی پڑھیں:امیر بالاج ٹیپو ٹرکاں والا کون تھا ؟
ٹیپو ٹرکاں والے کے بیٹے امیر بالاج ٹیپو کے قتل کیس کا مرکزی ملزم احسن شاہ مبینہ مقابلے میں مارا گیا۔ اس حوالے سے ڈی ایس پی آرگنائزڈ کرائم یونٹ نے بتایا کہ ملزم احسن شاہ اپنے ساتھیوں کی فائرنگ سے زخمی ہوا جسے ہسپتال منتقل کیا گیا تاہم وہ جانبر نہ ہو سکا۔
پولیس کے مطابق احسن شاہ کو نشاندہی کے لیے لے جایا جا رہا تھا کہ اس کے بھائی نے نامعلوم ساتھیوں کے ہمراہ اسے چھڑوانے کے لیے حملہ کر دیا۔ اس دوران مبینہ مقابلے کے دوران احسن شاہ زخمی ہوا اور زخموں کی تاب نہ لاتے ہوئے جاں بحق ہو گیا۔
یہ بھی پڑھیں:امیر بالاج قتل کیس میں نئی پیشرفت، پولیس نے گرفتار ملزم سے متعلق عدالت کو کیا بتایا؟
واضح رہے کہ امیر بالاج ٹیپو کو 18 فروری کو شادی کی تقریب میں فائرنگ کر کے قتل کر دیا گیا تھا۔لاہور پولیس کے مطابق ٹیپو ٹرکاں والا کا بیٹا امیر بالاج ٹیپو ٹھوکر نیاز بیگ کے قریب ایک نجی ہاؤسنگ سوسائٹی میں سابق ڈی ایس پی اکبر اقبال بلا کے بیٹے کی شادی کی تقریب میں شریک تھا۔
شادی کی تقریب کے دوران وہاں موجود ایک حملہ آور نے فائرنگ کردی جس سے امیر بالاج ٹیپو سمیت تین افراد زخمی ہوگئے جنہیں اسپتال منتقل کیا گیا۔
پولیس کے مطابق امیر بالاج ٹیپو زخموں کی تاب نہ لاتے ہوئے دم توڑ گیا تھا، جبکہ مقتول امیر بالاج ٹیپوکے محافظوں کی فائرنگ سے حملہ آور بھی موقع پر مارا گیا تھا۔
