میرے گمشدہ بچے کی بازیابی کا کیس ختم کردیا جائے، غریب خاتون کی سندھ ہائیکورٹ سے استدعا

غربت کے ہاتھوں مجبور ایک ماں نے سندھ ہائیکورٹ سے اپنے 8 سالہ گمشدہ بیٹے کی بازیابی کا کیس ختم کرنے کی استدعا کردی۔

سندھ ہائیکورٹ میں 8 سالہ ظہیرعلی سمیت دیگر لاپتا شہریوں کی بازیابی سے متعلق درخواستوں کی سماعت جسٹس نعمت اللہ پھلپھوٹو نے کی۔ لاپتا بچے کی والدہ نے عدالت میں اپنی درخواست کی خود پیروی کی۔

یہ بھی پڑھیں: کراچی سے لاپتا افراد کی بازیابی کے لیے کارروائی جاری رکھی جائے، سندھ ہائیکورٹ کا حکم

لاپتا بچے ظہیر علی کی والدہ نے عدالت کو بتایا کہ ہم حیدرآباد سے کراچی گھومنے کے لیے آئے ہوئے تھے کہ اس دوران میرے جگر کا ٹکڑا غائب ہوگیا۔

خاتون نے عدالت کو بتایا کہ میرے ساتھ پولیس اور فیس نہ ہونے کی وجہ سے وکیل کی جانب سے تعاون نہیں کیا جارہا، میرا شوہر ایک مزدور ہے جو بڑی مشکل سے گھر کے اخراجات پورے کررہا ہے۔

خاتون نے عدالت سے استدعا کی کہ میرا کیس ختم کردیا جائے، ہر پیشی پر حیدرآباد سے کراچی نہیں آسکتی، اگر میرا بیٹا ملنا ہوگا تو مل جائے گا، میں اللہ پر سب چھوڑ رہی ہوں۔

یہ بھی پڑھیں: لاپتا افراد کے خاندانوں کے لیے امدادی پیکیج کا اعلان

خاتون کی استدعا پر درخواست خارج

اس موقع پر جسٹس نعمت اللہ پھلپھوٹو نے ریمارکس دیے کہ آپ آنے کی تکلیف نہ کریں تو بھی کیس چلتا رہے گا، ہم آپ کے بچے کو بازیاب کرانے کی پوری کوشش کریں گے۔

عدالت نے دیگر شہریوں کی بازیابی کے لیے کارروائی جاری رکھنے کا حکم دیتے ہوئے 8 سالہ بچے کی گمشدگی کی درخواست اہل خانہ کی استدعا پر خارج کردی، عدالت نے مزید درخواستوں کی سماعت 4 ہفتے کے لیے ملتوی کردی ہے۔