ڈسٹرکٹ اینڈ سیشن کورٹ اسلام آباد نے چیئرمین تحریک انصاف عمران خان اور ان اہلیہ بشرٰی بی بی کے خلاف دائر پرائیوٹ شکایت پر سماعت 28 اپریل تک ملتوی کر دی۔
عمران خان اور بشرٰی بی بی پر عدت کے دوران نکاح کے الزام کے کیس کی سماعت جوڈیشل مجسٹریٹ نصرمِن اللّٰہ نے کی۔
مرکزی گواہ مفتی سعید احمد خان کی عمرہ پر روانگی کے باعث آج ان کا بیان ریکارڈ نہ ہو سکا۔
درخواست گزار کے وکیل نے عدالت کو بتایا کہ گواہ مفتی سعید احمد عمرے پر گئے ہیں، عدالت آئندہ کی کوئی تاریخ مقرر کردے۔
واضح رہے کہ درخواست میں استدعا کی گئی ہے کہ عدت کے دوران نکاح کرنے پر عمران اور بشریٰ بی بی کے خلاف سیکشن 496 کے تحت کارروائی کی جائے۔
عدالت نے کیس کی آئندہ سماعت 28 اپریل تک ملتوی کر دی۔
دوسری جانب ڈسٹرکٹ اینڈ سیشن کورٹ اسلام آباد کے ایڈیشنل سیشن جج ظفر اقبال نے عمران خان کے خلاف الیکشن کمیشن کی درخواست پر توشہ خانہ کیس کی سماعت 11 اپریل تک ملتوی کر دی۔
الیکشن کمیشن کی جانب سے توشہ خانہ کیس کی جلد سماعت مقرر کرنے کی درخواست پر سماعت کے دوران پی ٹی آئی کے جونیئر وکیل نے عدالت کو بتایا کہ ان کے کسی سینیئر وکیل سمیت عمران خان کو نوٹس کی تعمیل نہیں ہوئی ہے۔
پولیس کی جانب سے تاحال نوٹس کی تعمیل کی رپورٹ عدالت میں جمع نہیں کرائی جا سکی یہی وجہ تھی کہ ایڈیشنل سیشن جج نے تعمیلی نوٹس کی رپورٹ جمع ہونے تک توشہ خانہ کیس کی سماعت میں وقفہ کیا تھا۔
عمران خان کو توشہ خانہ کیس میں عدالت نے ذاتی حیثیت میں طلب کر رکھا تھا۔
