آسٹریلیا کے سابق اوپپنگ اوپننگ بلے باز ڈیوڈ وارنر نے بھارت کے خلاف ٹیسٹ سیریز کے لیے ریٹائرمنٹ واپس لینے کے لیے رضامندی کا اظہار کردیا ہے۔
ڈیوڈ وارنر کا کہنا ہے کہ اگر بھارت کے خلاف بارڈر گواسکر ٹرافی کے لیے ٹیم کو ان کی خدمات کی ضرورت پیش آئی تو وہ کرکٹ چھوڑنے سے متعلق اپنا فیصلہ واپس لے سکتے ہیں۔ واضح رہے کہ اس سلسلے میں انہوں نے شیفلڈ شیلڈ کھیلنے کی تیاری بھی شروع کردی ہے تاکہ وہ 5 ٹیسٹ میچوں کی سیریز میں بہترین کھیل پیش کرسکیں۔
مزید پڑھیں: کرکٹ سے ریٹائرمنٹ کے بعد ڈیوڈ وارنر نے ’ڈان‘ بننے کی تیاری کرلی
اوپنر بلے باز کی واپسی کی خبریں اس لیے زیر گردش ہیں کیونکہ بھارت کے خلاف سیریز کے لیے آسٹریلوی مینجمنٹ کو عثمان خواجہ کے ساتھ اب تک کوئی ایسا اوپنر بلے باز نہیں مل سکا جو ٹیم کی مشکلات کو کم کرسکے۔ ڈیوڈ وارنر کی ریٹائرمنٹ کے بعد تجرباتی طور پر اسٹیو اسمتھ سے اوپننگ کروائی گئی تھی تاہم سلیکشن کمیٹی کے سربراہ جورج بیلے نے اکتوبر کے شروع میں ہی یہ واضح کردیا تھا کہ اسمتھ کو نمبر 4 پر کھلایا جائے گا اور وہ اوپننگ نہیں کریں گے۔ اس کی وجہ ممکنہ طور پر یہ بھی ہوسکتی ہے کہ بطور اوپنر اسمتھ نے 8 اننگز میں 28.50 کی اوسط سے 171 رنز بنائے ہیں اور یہ کسی بھی نمبر پر ان کا سب سے کم ایوریج ہے۔
دوسری طرف ٹریوس ہیڈ کو بھی یہ ذمہ داری دی جاسکتی تھی تاہم بورڈ کو خدشہ ہے کہ ٹیسٹ کرکٹ میں وہ شاید بطور اوپننر اچھا کھیل پیش نہ کرسکیں۔ اس کے علاوہ بھارت کے خلاف اہم سیریز کے لیے فریکچر کا شکار کیمرون گرین کی خدمات بھی ٹیم کو حاصل نہیں ہوں گی۔
مزید پڑھیں: ڈیوڈ وارنر کو ہیرو کی طرح رخصت کرنے پر مچل جانسن سیخ پا کیوں ہیں؟
آسٹریلیا اور بھارت کے درمیان 5 ٹیسٹ میچ پر مشتمل سیریز کا پہلا میچ 22 نومبر سے شروع ہوگا جو پرتھ کے میدان میں کھیلا جائے گا۔
