محمد عامر کا تعلق پنجاب سے ہے لیکن 8 برس قبل وہ روزگار کی تلاش میں کراچی آگئے جہاں اب وہ کراچی پریس کلب میں بطور ویٹر کام کر رہے ہیں۔
ان کی خوبصورت گائیکی سے کراچی پریس کلب کے اراکین تو محظوظ ہوتے ہی تھے لیکن اب سوشل میڈیا نے ان کی آواز دور دور تک پہنچا دی ہے اور اب وہ پہلے سے کہیں زیادہ بڑے پیمانے پر داد وصول کر رہے ہیں۔
محمد عامر کہتے ہیں کہ ان کو گانے کا شوق تو بچپن سے ہی تھا لیکن جب وہ کراچی پریس کلب میں بھی گنگنانے لگے تو صحافیوں نے ان کی خوب ہمت افزائی کی اور فرمائش کرکے ان سے اکثر گیت سننے لگے۔
یہ بھی پڑھیں: وہ پاکستانی اسٹارز جنہیں سوشل میڈیا کی بدولت شہرت ملی
اکثر یوں بھی ہوا کہ اراکین کلب نے کسی ساتھی کی سالگرہ کی تقریب سجالی یا کوئی اور پارٹی رکھی تو محمد عامر سے گانے کی فرمائش کردی۔
محمد عامر کا کہنا ہے کہ حال ہی میں انہوں نےکراچی میں واقع نیشنل اکیڈمی آف پرفارمنگ آرٹس (ناپا) سے گانے کی کلاسز بھی لی ہیں جس سے انہیں اپنے فن کو نکھارنے میں خاصی مدد ملی ہے۔
مزید پڑھیے: کراچی پریس کلب کا ارشد ندیم کو تاحیات رکنیت دینے کا اعلان
نصرت فتح علی خان اور عطا اللہ خان عیسیٰ خیلوی ان کے پسندیدہ گائیک ہیں۔ انہوں نے کہا کہ گائیکی کے حوالے سے میری کوششیں جاری ہیں اور جب اور جہاں بھی موقع ملے گا میں گاتا رہوں گا۔
