وزیراعظم پاکستان شہباز شریف نے چینی سفارتخانے میں جاکر گزشتہ روز کراچی میں چینی شہریوں پر ہونے والے فائرنگ کے واقعے کی مذمت کی ہے، اور ملزمان کو جلد گرفت میں لاکر قرار واقعی سزا دلانے کی یقین دہانی بھی کرائی ہے۔
وزیراعظم ہاؤس کے مطابق شہباز شریف نے چینی سفارتخانے کے دورے کے موقع پر پاکستان میں چین کے سفیر جیانگ زائیڈونگ سے ملاقات کی۔
یہ بھی پڑھیں چینی قونصل خانہ حملہ کیس: کیا ملزمان نے اعتراف جرم کرلیا؟
وزیراعظم نے چینی سفیر سے گفتگو کرتے ہوئے کہاکہ میں چینی شہریوں پر کراچی میں حملے کی مذمت کرنے اور زخمیوں کی بیمار پرسی کے لیے آپ سے ملنے آیا ہوں۔
وزیراعظم نے چینی سفیر کو ذمہ داران کو جلد گرفت میں لے کر انہیں قرار واقعی سزا دلوانے کی یقین دہانی کرائی۔
انہوں نے کہاکہ واقعے میں ملوث افراد کو گرفت میں لینے اور انہیں قرار واقعی سزا دلوانے کے عمل کی بذات خود نگرانی کررہا ہوں، واقعے میں زخمی چینی شہریوں کو بہترین طبی سہولیات فراہم کرنے کی ہدایات دی ہیں۔
انہوں نے کہاکہ قابلِ اطمینان بات ہے کہ واقعے میں زخمی ہونے والے چینی شہریوں کی صحت بہتر ہو رہی ہے۔
انہوں نے کہاکہ چین پاکستان کا دیرینہ دوست ہے، چینی شہریوں پر حملہ پاک چین برادرانہ تعلقات کو نقصان پہنچانے کی مذموم کوشش ہے، پاکستان میں کام کرنے والے چینی شہریوں کی سیکیورٹی حکومت کی اولین ترجیح ہے۔
امید ہے ملزمان کو کیفر کردار تک پہنچایا جائے گا، چینی سفیر
اس موقع پر چینی سفیر نے وزیراعظم کی سفارتخانے آمد پر شکریہ ادا کیا اور امید کا اظہار کیاکہ وزیراعظم واقعے کے ذمہ داران کو جلد کیفر کردار تک پہنچانے میں اپنا کردار ادا کریں گے۔
یہ بھی پڑھیں داسو میں چینی انجینیئرز پر حملہ: دونوں ماسٹر مائینڈ ساہیوال میں مارے گئے
اس موقع پر وزیراعظم کے ہمراہ نائب وزیراعظم و وزیرِ خارجہ اسحاق ڈار، وزیرِداخلہ محسن رضا نقوی اور معاون خصوصی طارق فاطمی بھی موجود تھے۔
