آئینی بینچز کی تشکیل اور مقدمات کی سماعت سے متعلق سپریم کورٹ کے ججز بھی منتظر

سپریم کورٹ آف پاکستان کے آئینی بینچز کب مقدمات کی سماعت شروع کریں گے، اس بات کا انتظار عام لوگوں کے ساتھ ساتھ سپریم کورٹ کے جج صاحبان کو بھی ہے اور آج ایک کیس کی سماعت کے دوران اس بارے میں دلچسپ مکالمہ بھی سننے کو ملا۔

سپریم کورٹ میں ٹیکس سے متعلق کیس کی سماعت کے دوران جسٹس عائشہ ملک نے کہاکہ یہ کیس آئینی بینچ سنے گا، ہم ریگولر بینچ سن رہے ہیں۔ اس پر جسٹس منصور علی شاہ بولے کہ اس وقت کوئی آئینی بینچ نہیں تو یہ جو غیر آئینی بینچ بیٹھا ہے اس کا کیا کرنا ہے۔

یہ بھی پڑھیں پریکٹس اینڈ پروسیجر کمیٹی کے اجلاس کے بعد آئینی بینچز جلد کام شروع کریں گے، سپریم کورٹ اعلامیہ

انہوں نے ازراہ تفنن کہاکہ جب تک آئینی بنچ نہیں بیٹھے گا کیا ہم غیر آئینی ہیں؟ جسٹس منصور علی شاہ نے مزید ریمارکس دیے کہ ہم اس کیس کو سن بھی لیں تو کوئی ہمیں پوچھ نہیں سکتا اور نظر ثانی بھی ہمارے پاس آئے گی تو ہم کہہ دیں گے کہ ہمارا دائرہ اختیار ہے۔

’آئینی بینچز کے لیے پریکٹس اینڈ پروسیجر کمیٹی مکمل ہوگئی‘

سپریم کورٹ کی جانب سے جاری ایک اعلامیے میں کہا گیا ہے کہ آئینی بینچز کی تشکیل سے متعلق پریکٹس اینڈ پروسیجر کمیٹی ایک جج صاحب کے ملک میں نہ ہونے کی وجہ سے مکمل نہیں تھی، ان کے ساتھ مشاورت کے بعد 3 ججز پر مشتمل پریکٹس اینڈ پروسیجر کمیٹی آئینی بینچوں کی تشکیل کرے گی اور مقدمات سماعت کے لیے مقرر کیے جائیں گے۔

اعلامیے کے مطابق آئینی بینچز کے لیے پریکٹس اینڈ پروسیجر کمیٹی آئینی بینچ کے سربراہ جسٹس امین الدین خان، جسٹس جمال خان مندوخیل اور جسٹس محمد علی مظہر پر مشتمل ہے۔

’جسٹس جمال خان مندوخیل چین کے دورے پر ہونے کی وجہ سے اس کمیٹی کا اجلاس نہیں ہو پایا تھا لیکن اب ان کی واپسی کے بعد اس کمیٹی کا اجلاس جلد متوقع ہے اور مقدمات سماعت کے لیے مقرر کیے جائیں گے۔ یہاں یہ امر دلچسپی سے خالی نہیں کہ 26 ویں آئینی ترمیم کے بعد آئینی بینچوں کے لیے ججز کی کم از کم تعداد 5 ہے‘۔

آئینی بینچ کون سے 2 اہم مقدمات سنے گا؟

آئینی بینچ ممکنہ طور پر جو دو اہم مقدمات سنے گا، ان میں سے ایک تو 26 ویں آئینی ترمیم کے خلاف 8 درخواستیں ہیں۔ جماعت اسلامی، افراسیاب خٹک، بلوچستان بار ایسوسی ایشن، لاہور ہائیکورٹ بار ایسوسی ایشن، بیرسٹر صلاح الدین کے ساتھ ساتھ کچھ اور لوگوں نے بھی 26 ویں آئینی ترمیم کو آئین کی روح کے منافی قرار دینے کے لیے درخواستیں دے رکھی ہیں۔ لیکن بالفرض یہ درخواستیں منظور ہو جاتی ہیں تو اس سے آئینی بینچ ہی ختم ہو جائےگا۔

دلچپسپ بات یہ ہے کہ بایی پی ٹی آئی عمران خان واضح طور پر 26 ویں آئینی ترمیم کی مخالفت کر چکے ہیں لیکن پی ٹی آئی کی جانب سے تاحال کوئی درخواست دائر نہیں کی گئی۔

دوسرا اہم کیس جو ممکنہ طور پر آئینی بینچ میں زیرسماعت آسکتا ہے وہ پی ٹی آئی، سنی اتحاد کونسل مخصوص نشستوں کے حوالے سے نظر ثانی اپیلیں ہیں۔ آئینی بینچوں میں اس درخواست کی سماعت بھی دلچسپ ہوسکتی ہے۔

’آئینی بنیچوں کے قیام کے بعد عام مقدمات کے فیصلوں میں تیزی‘

سپریم کورٹ کی جانب سے گزشتہ ایک ہفتے کے مقدمات کے دائر اور نمٹائے جانے کی تفصیلات کی مطابق گزشتہ ہفتے 302 مقدمات دائر جبکہ 679 مقدمات نمٹائے گئے۔ اس کے ساتھ ساتھ ایک ہفتے میں 377 سے زیادہ مقدمات نمٹائے گئے۔ ایک دن کے اعداد و شمار کے مطابق 5 نومبر کو 38 مقدمات دائر ہوئے جبکہ اسی روز 220 مقدمات نمٹائے گئے جس سے 60 ہزار زیرالتوا مقدمات میں کمی ہونا شروع ہوگئی ہے۔

یہ بھی پڑھیں کیا آئینی بینچوں کی وجہ سے مقدمات مزید تاخیر کا شکار ہو سکتے ہیں؟