پنجاب حکومت کی جانب سے مقامی ٹیکنالوجی سے مصنوعی بارش برسانے کا تجربہ کامیاب ہوگیا ہے، جہلم، چکوال، تلا کنگ میں مصنوعی بارش ہوئی ہے۔
محکمہ ماحولیات نے تصدیق کی ہے کہ مقامی ٹیکنالوجی سے ’سیڈ کلاؤڈنگ‘ کی گئی، سیڈ کلاؤڈنگ کے نتیجے میں جہلم، گوجر خان، تلہ کنگ اور گوجر خان میں مصنوعی بارش برسائی گئی ہے۔
یہ بھی پڑھیں: انسداد اسموگ: لاہور میں گرین لاک ڈاؤن کے بعد مصنوعی بارش کب ہوگی؟
2 بجے سیڈ کلاؤڈنگ سے مذکورہ علاقوں میں مصنوعی بارش ہوئی، سیڈ کلاؤڈنگ کے اثرات سے لاہور میں بھی بارش ہونے کا امکان ہے۔
پاک آرمی کی ٹیکنیکل ٹیم اور محکمہ ماحولیات نے مل کر مصنوعی بارش کا تجزیہ کیا۔
وزیراعلیٰ پنجاب کی ماہرین کو مبارکباد
افواج پاکستان کے سائنسی تحقیق اور ترقی کے ماہرین (ایس پی ڈی)، آرمی ایوی ایشن، پارکو، ماحولیاتی تحفظ کے ادارے (ای پی اے) اور حکومت پنجاب نے اشتراک عمل سے مصنوعی بارش کے منصوبے میں کامیابی حاصل کی ہے۔
وزیراعلی پنجاب مریم نواز نے تمام متعلقہ اداروں اور سائنسی ماہرین کو مصنوعی بارش کے کامیاب تجربے پر مبارک باد اور ان کا کہنا تھا کہ آج آپ کی محنت، لگن اور قابلیت سے صوبہ پنجاب نے ایک نئی تاریخ رقم کی ہے، پوری قوم آپ پر فخر کرتی ہے۔
یہ بھی پڑھیں: لاہور میں اسموگ پر قابو پانے کے لیے ایک بار پھر مصنوعی بارش کی تیاریاں
سینیئر صوبائی وزیر مریم اورنگزیب نے عوام اور تمام ٹیم کو مبارک باد دیتے ہوئے کہا کہ الحمدللہ، آج بارش کی صورت میں اچھی خبر آئی ہے، گزشتہ برس متحدہ عرب امارات کے تعاون سے مصنوعی بارش برسانے کا تجربہ کیا گیا تھا۔
انہوں نے کہا کہ اس بار 100 فیصد اپنی مقامی مہارت اور ٹیکنالوجی سے کامیاب تجربہ کیا گیا۔
