پاکستان اسکاؤٹس ایسوسی ایشن کے وفد نے، بین الاقوامی امور اور یوتھ پروگرام کے ڈپٹی ڈائریکٹر توصیف صدیقی کی قیادت میں، یو این ایف پی اے کے ریجنل ڈائریکٹر پیو اسمتھ کے ساتھ فکرانگیزمذاکرے میں حصہ لیا۔
جمعہ کو سرینا ہوٹل اسلام آباد میں ہونے والے اس مذاکرے میں مختلف مہارتوں پر مبنی سیکھنے، ذہنی صحت اور پاکستان میں نوجوانوں کے مستقبل کے حوالے سے تبادلہ خیال کیا گیا۔
پاکستان اسکاؤٹس ایسوسی ایشن کے وفد کے نمایاں ارکان میں وردہ عدلِ جہانگیر، ثنا اور وجیہہ الحسن شامل تھے، جنہوں نے ملک بھر میں نوجوانوں کی ترقی کے لیے کی جانے والی کوششوں اور اپنے نقطہ نظرکو پیش کیا۔
’یو این ایف پی اے‘کے ریجنل ڈائریکٹر نے ایسوسی ایشن کے پاکستان بوائے اسکاؤٹس ایسوسی ایشن سے پاکستان اسکاؤٹس ایسوسی ایشن کے حالیہ ری برانڈنگ کی تعریف کی، یہ ایک ایسا قدم ہے جو شمولیت کو فروغ دیتا ہے اور لڑکیوں کے لیے اسکاؤٹنگ کی سرگرمیوں میں فعال طور پر شامل ہونے کے مواقع پیدا کرتا ہے۔ یہ ری برانڈنگ نوجوانوں کو بااختیار بنانے اور نوجوانوں کے پروگراموں میں صنفی توازن کو فروغ دینے کے وسیع وژن کے مطابق ہے۔
مذاکرے میں ذہنی صحت کے چیلنجز سے نمٹنے اور نوجوانوں کو ذاتی اور پیشہ ورانہ ترقی کے لیے ضروری مہارتوں سے آراستہ کرنے کے لیے اقدامات اور سیکھنے کی اہمیت پر زور دیا گیا۔
اس موقع پرتوصیف صدیقی نے کہا کہ پاکستان اسکاؤٹس ایسوسی ایشن اچھی طرح سے نوجوان لیڈروں کو تیار کرنے، شمولیت کو فروغ دینے اور قومی ترقی میں اپنا حصہ ڈالنے کے عزم کو جاری رکھے ہوئے ہے۔
