بانی پاکستان تحریک انصاف (پی ٹی آئی) عمران خان اور وزیراعلیٰ خیبر پختونخوا علی امین گنڈاپور کے خلاف ہکلہ انٹرچینج کے قریب پولیس کانسٹیبل کی ہلاکت اور 3اہلکاروں کے زخمی ہونے کا مقدمہ ٹیکسلا میں درج کرلیا گیا۔
تھانہ ٹیکسلا میں پولیس کی مدعیت میں درج مقدمے میں سابق وزیراعظم عمران خان، وزیراعلیٰ خیبر پختونخوا علی امین گنڈاپور، سالار خان کاکڑ، شاہد خٹک اور عمر امین گنڈاپور کو نامزد کیا گیا ہے، مقدمے میں تعزیرات پاکستان کی دفعہ 14 اور انسداد دہشتگردی ایکٹ کی دفعات بھی شامل کی گئی ہیں۔
مزید پڑھیں: پی ٹی آئی احتجاج: عمران خان سمیت درجنوں سینیئر رہنماؤں کے خلاف اقدام قتل اوردہشتگردی کا مقدمہ درج
مقدمے کے مطابق حملہ آور ملزمان ٹیئر گیس گن، ربڑ بلٹس گنز اور اسلحہ سے مسلح تھے جنہوں نے پولیس افسران، اہلکاروں پر ڈنڈوں، پتھروں سے حملہ کیا۔ ملزمان نے دفعہ 144 کی خلاف ورزی کی۔
ایف آئی آر کے مطابق بانی پی ٹی آئی عمران خان و دیگر قیادت کی مجرمانہ سازش کے تحت پولیس پر حملہ کیا گیا اور ملزمان کی شیلنگ کے باعث پولیس کو منتشر ہونا پڑا۔
یہ بھی پڑھیں: ٹیکسلا: عمران خان، بشریٰ بی بی اور علیمہ خان سمیت پی ٹی آئی کی اعلیٰ قیادت کیخلاف مقدمہ درج
ملزمان نے کانسٹیبل مبشر حسن کو زخمی کیا اور لال وین میں اغوا کرکے لے گئے، ملزمان کے حملے میں کانسٹیبل عدنان، ریئس، نعیم بھی زخمی ہوئے، بعد میں اطلاع ملی کہ ملزمان کانسٹیبل مبشر حسن کو ہکلہ پل کے نیچے پھینک کر فرار ہوگئے، اس کے بعد کانسٹیبل مبشر حسن کو اسپتال منتقل کیا گیا لیکن وہ جانبر نہ ہوسکا۔
