انگلینڈ کی کپتانی چھوڑنے والے جوز بٹلر کے کیریئر پر ایک نظر

آئی سی سی چیمیئنز ٹرافی میں جنوبی افریقہ کے خلاف میچ جوز بٹلر کا بطور کپتان آخری میچ ہوگا کیوں کہ انہوں نے افغانستان سے شکست کے سبب مقابلے سے باہر ہوجانے پر کپتانی چھوڑنے کا اعلان کردیا ہے۔

یہ بھی پڑھیں: چمیپیئنز ٹرافی: افغانستان سے شکست پر انگلینڈ کے کپتان مستعفی

یاد رہے کہ چیمپئنز ٹرافی گروپ بی کے اہم میچ میں افغانستان نے دلچسپ مقابلے کے بعد انگلینڈ کو شکست دے کر سیمی فائنل کی دوڑ سے باہر کردیا تھا۔

جوز بٹلر نے جمعے کو انگلش کوچ برینڈن میکولم  کے ہمراہ پریس کانفرنس کرتے ہوئے کہا کہ یہ میرے لیے درست وقت ہے کہ میں یہ عہدہ چھوڑ دوں۔

یاد رہے کہ افغانستان کی جانب سے دیے گئے 326 رنز کی ہدف کے تعاقب میں انگلینڈ کی ٹیم 317 رنز بنا کر آل آؤٹ ہوگئی تھی اور 8 رنز کے فرق سے میچ کے ساتھ ساتھ ٹورنامنٹ بھی اس کے ہاتھ سے جاتا رہا تھا۔

بٹلر کا کیریئر، بطور کپتان کارکردگی

بٹلر نے مجموعی طور پر 44 ون ڈے میچوں میں انگلینڈ کی کپتانی کی جس میں 18 جیتے اور 25 میں شکست ہوئی جبکہ ایک میچ کا نتیجہ نہیں نکلا تھا۔

ٹی 20 میچوں میں بٹلر کا بطور کپتان بہتر ریکارڈ ہے۔ ان کی قیادت میں ٹیم نے 51 میچوں میں سے 26 میں فتح حاصلی کی، 22 میں شکست کھائی جبکہ 3 بے نتیجہ رہے۔

مزید پڑھیے: افغانستان نے سنسنی خیز مقابلے کے بعد انگلینڈ کو ہرا کر چیمپیئنز ٹرافی سے باہر کردیا

34 سالہ بٹلر نے 57 ٹیسٹ میچز کھیلے اور کل 2 ہزار 907 رنز بنائے۔ انہوں نے 2 سینچریاں اور 18 نصف سینچریاں بنائیں اور ان کا سب سے زیادہ اسکور 157 رنز ہے۔

انہوں نے کل 186 ایک روزہ انٹرنیشنل میچ کھیلے جن میں ان کا مجموعی اسکور 5 ہزار 175 رہا۔ ایک روزہ میچوں میں انہوں نے 11 سینچریاں اور 27 نصف سینچریاں اسکور کیں۔ اس فارمیٹ میں ان کا ہائیسٹ اسکور 162 رنز ناٹ آؤٹ رہا۔

ٹی 20 فارمیٹ (بین الاقوامی) میں بٹلر نے 134 میچوں میں حصہ لیا اور 3 ہزار 535 رنز بنائے۔  اس فارمیٹ میں انہوں نے 26 نصف سینچریاں اور ایک سینچری بنائی۔ اس طرح ان کا سب سے زیادہ اسکور ناقابل شکست 101 رنز رہا۔

واضح رہے کہ جوز بٹلر نے سنہ 2011 میں ٹی 20 میچوں سے اپنے انٹرنیشنل کیریئر کا آغاز کیا تھا۔ انہوں نے ایک روزہ انٹرنیشنلز میں اینٹری سنہ 2012 میں دی جبکہ ٹیسٹ کرکٹ میں ان کا ڈیبیو سنہ 2014 ہوا۔