وفاقی کابینہ کے اجلاس میں سوات کے علاقے کبل میں کاؤنٹر ٹیررازم ڈیپارٹمنٹ )سی ٹی ڈی) پولیس اسٹیشن میں دھماکے کے نتیجے میں جانی نقصان پر گہرے دکھ کا اظہار کرتے ہوئے شہدا کے لیے فاتحہ خوانی اور زخمیوں کی جلد صحت یابی کی دعا کی گئی۔
وزیراعظم محمد شہباز شریف کی زیر صدارت وفاقی کابینہ کے اجلاس میں کئی اہم فیصلے کیے جن میں کبل شہدا پیکج، اقتصادی رابطہ کمیٹی کے فیصلوں کی توثیق، انویسٹ پاکستان کے لیے قانون سازی اور ماحول دوست گاڑیوں کے لیے فنانسنگ کی منظوری بھی شامل ہے۔
اجلاس میں وزیراعظم نے وفاقی وزارت داخلہ کو کبل میں ہونے واقعے کی تحقیقات میں وفاقی حکومت کا نمائندہ شامل کرنے اور پشاور پولیس لائن دھماکے کے شہدا پیکج کی طرز پر کبل کے شہیدوں کے ورثا کو بھی ادائیگی کی ہدایت کی۔
وفاقی کابینہ نے پنجاب اور خیبر پختونخواہ کے عام انتخابات کے حوالے سے الیکشن کمیشن آف پاکستان کو 21 ارب روپے کی فراہمی کے حوالے سے وزارت خزانہ کی سمری کو پارلیمنٹ کو ریفر کرنے کی منظوری دی.
اس کے علاوہ کابینہ نے سرمایہ کاری بورڈ کی سفارش پر ’انویسٹ پاکستان‘ کے لیے قانون سازی کرنے کی منظوری بھی دی جس کے ذریعے سرمایہ کاری بورڈ کے تحت دفتر قائم کیا جائے گا جو پبلک پرائیویٹ پارٹنر شپ میں کام کرے گا۔
وفاقی کابینہ نے اقتصادی رابطہ کمیٹی کے 13 اپریل 2023 کو منعقد ہونے والے اجلاس میں کیے گئے فیصلوں کی توثیق کی۔ ان فیصلوں میں جنوبی وزیرستان کے انگور اڈا کسٹم اسٹیشن کو افغانستان اور وسطی ایشیائی ریاستوں کے لیے ایکسپورٹ لینڈ روٹ ڈیکلئیر کرنے کی منظوری شامل تھی۔
مزید برآں فیصلوں میں ماحول دوست الیکٹرک بائیکس اور الیکٹرک رکشاز کا استعمال عام کرنے کے لیے فنانسنگ فسیلیٹی کی منظوری بھی شامل ہے جس کے تحت 5 لاکھ روپے کا قرضہ پرائم منسٹر یوتھ بزنس اینڈ ایگرکلچر لون اسکیم کے ذریعے صفر فیصد مارک اپ پر دستیاب ہوگا۔ اس اقدام سے ملک کو مہنگے ایندھن کے درآمد کی مد میں خاطر خواہ بچت ہو گی.
وفاقی کابینہ نے وزارت بحری امور کی سفارش پر اِن لینڈ ریوینو سروس کے گریڈ21 کے افسر سیدین رضا زیدی کو ڈیپوٹیشن کی بنیاد پر کراچی پورٹ ٹرسٹ کا چیئرمین تعینات کرنے کی منظوری دے دی۔
