وزیراعظم شہباز شریف نے لاہور میں ٹریڈ ڈیویلپمنٹ اتھارٹی آف پاکستان کے زیر اہتمام ہیلتھ انجینیئرنگ اینڈ منرلز شو کی تقریب سے خطاب کرتے ہوئے کہا کہ دنیا بھر سے ماہرین اور کاروباری شخصیات کو یہاں ایک ساتھ دیکھ کر خوشی ہوئی۔
ان کا کہنا تھا کہ پاکستان ترقی اور خوشحالی کی طرف گامزن ہے، ہماری 60 فیصد سے زیادہ آبادی 15 اور 30 سال کے درمیان ہے، یہ ذہین نوجوان ہیں جنہیں جدید اور پیشہ ورانہ تربیت سے آراستہ کریں گے۔
وزیراعظم نے کہا کہ اللہ تعالیٰ نے پاکستان کو قیمتی قدرتی وسائل سے نوازا ہے، میں نے اسٹالز کا دورہ کیا جہاں نایاب پتھروں، معدنیات، زرعی مشینری اور فارماسیوٹیکل مصنوعات رکھی گئی ہیں۔
یہ بھی پڑھیے: دنیا زراعت میں آگے نکل گئی ہم قیمتی وقت کا ضیاع کرتے رہے، وزیراعظم شہباز شریف
انہوں نے غیرملکی سرمایہ کاروں کو کہا کہ آپ نے جو معاہدے کیے ہیں ہم سب کو مشترکہ خوشحالی کے سفر پر لے جائیں گے۔ آئیے! ریسرچ اینڈ ڈیویلپمنٹ، ٹیکنالوجی اور جدت کی طرف بڑھیں۔
وزیراعظم نے کہا کہ پاکستان میں مہنگائی 38 فیصد سے ایک اعشاریہ 5 فیصد تک آگئی ہے، پالیسی ریٹ 22.5 فیصد سے 12 فیصد تک آگئی ہے، توانائی کے شعبے میں بجلی کی قیمتوں میں 7 روپے فی یونٹ کمی کردی ہے، یہ سب کچھ سرمایہ کاری کے لیے بہترین موقع فراہم کررہے ہیں۔
وزیراعظم نے سرمایہ کاروں کو مائنز اینڈ منرلز کے شعبے میں سرمایہ کاری کی دعوت دیتے ہوئے کہا کہ یہ آپ کو منافع بخش سرمایہ کاری کا موقع فراہم کرتا ہے۔
یہ بھی پڑھیے: اوورسیز پاکستانیز کنونشن: وزیراعظم شہباز شریف نے کونسے اہم اعلانات کیے؟
وزیراعظم نے کہا کہ میں آپ کی خدمت اور آپ کو سازگار ماحول فراہم کرنے کے لیے ملک کا چیف ایگزیکٹیو آفیسر بننا پسند کروں گا۔
انہوں نے کہا کہ میں متعلقہ وزارتوں سے کہوں گا کہ وہ آپ کے ساتھ بیٹھ کر آپ سے ٹھوس تجاویز لیں، میں اسلام آباد میں آپ کے ساتھ بیٹھ کر مشاورت کروں گا۔
