لاہور ہائی کورٹ نے عمران خان کو تحریک انصاف کے چیئرمین کے عہدے سے ہٹانے کی درخواست پر شہری محمد جنید کی اضافی دستاویزات عدالتی ریکارڈ کا حصہ بنانے کی استدعا منظور کر لی۔
عمران خان کو تحریک انصاف کے چیئرمین کے عہدے سے ہٹانے کی درخواست کی پرسماعت لاہور ہائی کورٹ کے جسٹس عابد حسین چٹھہ نے کی۔
درخواست گزار شہری محمد جنید کے وکیل آفاق احمد نے موقف اختیار کیا کہ توشہ خانہ کےحقائق چھپانے پر الیکشن کمیشن نےعمران خان کو نااہل قرار دیا۔
’سابق وزیر اعظم نواز شریف کو بھی عدالت نے نا اہل قرار دیا تو اس کے بعد نواز شریف پارٹی کے صدر بھی نہیں رہے تھے۔ نااہلی کے بعد کوئی شخص پارٹی سربراہ نہیں رہ سکتا۔‘
درخواست گزارمحمد جنید کا مؤقف تھا کہ عمران خان کو تحریک انصاف کے چیئرمین کے عہدے سے ہٹانے کے لیے الیکشن کمیشن سے رجوع کیا مگر عہدے سے ہٹانے کی درخواست پر کوئی کارروائی نہیں کی گئی۔
درخواست گزار نے عدالت سے عمران خان کو چیئرمین تحریک انصاف کے عہدے سے ہٹانے کا حکم دینے کی استدعا کی ہے۔
عدالت نے درخواست گزار کی کیس میں اضافی دستاویزات جمع کروانے کی استدعا منظور کرتے ہوئے کیس کی سماعت 9 مئی تک ملتوی کردی ہے۔ عدالت نے آئندہ سماعت پر درخواست گزار کو دلائل پیش کرنے کی ہدایت بھی کی ہے۔
