جون کی جھلسا دینے والی گرمی نے وادی کوئٹہ کو بھی اپنی لپیٹ میں لے رکھا ہے اور ایسے میں شہریوں کی اولین ترجیح بن گیا ہے گنے کا ٹھنڈا رس۔ بازاروں میں جوس کارنر پر رش، اسٹالز پر خریداروں کی قطاریں اور گنے کی میٹھی خوشبو اس قدرتی مشروب کی اہمیت کی واضح دلیل ہے۔
ماہرین صحت کے مطابق گنے کا رس نہ صرف فوری توانائی بخشتا ہے بلکہ جسمانی ڈی ہائیڈریشن، معدے کے مسائل اور جگر کی کمزوری جیسے مسائل میں بھی فائدہ مند ہے۔
کوئٹہ کی معروف سریاب روڈ، علمدار روڈ اور لیاقت بازار میں گنے کے رس کے درجنوں اسٹالز نظر آتے ہیں۔ جوس بیچنے والے کہتے ہیں کہ ہم روزانہ 100 سے زیادہ گلاس فروخت کرتے ہیں۔ گنے کا رس اب صرف مشروب نہیں رہا، ایک صحت مند رجحان بن چکا ہے۔
وادی کوئٹہ کی گرم اور خشک فضا میں گنے کا رس ایک قدرتی، سستا اور آسان حل ہے جو نہ صرف پیاس بجھاتا ہے بلکہ جسم کو تازگی اور توانائی بھی دیتا ہے۔ مگر ضرورت ہے کہ اس صحت مند رجحان کو صفائی اور اعتدال کے ساتھ اپنایا جائے تاکہ فائدہ حقیقی ہو اور نقصان کا اندیشہ نہ ہو۔
