ایرانی انسانی حقوق کی علمبردار اور نوبل امن انعام یافتہ نرگس محمدی نے اسرائیل اور امریکا کی جانب سے ایران پر حملے کی شدید مخالفت کرتے ہوئے اسے آزادی یا جمہوریت کی طرف نہیں، تباہی کی طرف قدم قرار دیا ہے۔
سماجی رابطے کی ویب سائٹ ایکس (سابق ٹوئٹر) پر مختصر بیان میں نرگس محمدی نے کہا کہ جو بات مجھے یقینی طور پر معلوم ہے وہ یہ ہے کہ جنگ کبھی جمہوریت، انسانی حقوق یا آزادی نہیں لاتی۔
نوبل امن انعام حاصل کرنے والی نرگس محمدی نے ناروے کے اخبار کلاسے کمپن (Klassekampen) کو دیے گئے ایک انٹرویو میں اپنی تنقید کا مرکزی نکتہ اسرائیلی وزیراعظم بنیامن نیتن یاہو اور امریکی پالیسیوں کو بنایا۔ انہوں نے کہا کہ نیتن یاہو ہمیں جہنم کی طرف لے جا رہے ہیں، اور ہمیں آزادی کا جھوٹا وعدہ دے رہے ہیں۔ انہیں یقین نہیں کہ امریکی بم ایرانی عوام کو آزادی دلا سکتے ہیں۔
What I am certain of is that war never brings democracy, human rights, or freedom.#NoToWarhttps://t.co/JbATTmdVok pic.twitter.com/MqujW9xaP1
— Narges Mohammadi | نرگس محمدی (@nargesfnd) June 23, 2025
نرگس محمدی نہ صرف ایرانی حکومت کی ناقد رہی ہیں بلکہ خواتین کے حقوق کی نمایاں آواز کے طور پر کئی بار جیل بھی کاٹ چکی ہیں۔ وہ ایران میں جبر و استبداد کے خلاف اپنی جدوجہد کے باعث عالمی سطح پر جانی پہچانی جاتی ہیں۔
ان کا حالیہ بیان ایران، اسرائیل اور امریکا کے درمیان بڑھتے تناؤ کے پس منظر میں سامنے آیا ہے، جبکہ ایران میں سیاسی و سماجی حلقوں میں اس جنگی صورتحال پر گہری تشویش پائی جاتی ہے۔
