بلوچستان کے علاقے ژوب میں شدید بارشوں کے باعث ڈی آئی خان قومی شاہراہ پر لینڈ سلائیڈنگ ہوئی ہے۔
خطرے کے پیش نظر قومی شاہراہ کو بند کر دیا گیا ہے جس کی وجہ سے گاڑیوں کی لمبی قطاریں لگ گئی ہیں۔
اسسٹنٹ کمشنر شیرانی کی جانب سے انتباہ جاری کرتے ہوئے مسافروں کو ڈی آئی خان شاہراہ پر سفر سے گریز کرنے کا کہا گیا ہے۔
حکام کا کہنا ہے کہ شاہراہ کی بحالی کے لیے ہیوی مشینری بھیجی جا رہی ہے۔
واضح رہے کہ گزشتہ روز بلوچستان میں طوفانی بارشوں اور آسمانی بجلی گرنے سے 3 افراد جاں بحق اور متعدد زخمی ہوئے تھے۔
مغربی ہواؤں سے بلوچستان میں بارشوں کا سلسلہ جاری ہے۔ صوبے کے 7 اضلاع میں موسلا دھار بارشوں نے عوام کو شدید متاثر کیا ہے۔ بارشوں اور آسمانی بجلی گرنے کے مختلف حادثات میں 3 افراد جاں بحق جبکہ متعدد زخمی ہوئے۔
بلوچستان میں گزشتہ روز سے شروع ہونے والا بارشوں کا سلسلہ وقفے وقفے سے جاری ہے۔ گزشتہ 24 گھنٹوں کے دوران صوبے کے 7 اضلاع کیچ، پنجگور، واشک، خضدار، مستونگ، سوراب اور لسبیلہ میں بارشیں ہوئیں، کئی علاقوں میں جانی و مالی نقصانات بھی ہوئے۔
پی ڈی ایم اے کے مطابق تربت میں کلاؤڈ برسٹ کے باعث شہر میں اربن فلڈنگ کی صورتحال پیدا ہوگئی تاہم شہر میں اب حالات کنٹرول میں ہیں۔ خضدار میں آسمانی بجلی گرنے سے 2 بچے جاں بحق اور 2 افراد زخمی ہوئے۔ کیچ میں بارشوں سے پھسلن کے باعث کار کو حادثہ پیش آیا جس سے ایک شخص جاں بحق ہوگیا۔
طوفانی بارشوں سے نشیبی علاقے زیر آب آ گئے اور کئی کچے مکانوں کو بھی نقصان پہنچا۔ بیلہ میں مائی پیر کے علاقے میں آسمانی بجلی گرنے سے ایک خاتون جھلس گئی۔
پی ڈی ایم اے کے مطابق سیلابی صورت حال کے باوجود تمام شاہراہیں اور رابطہ سڑکیں ٹریفک کے لیے کھلی ہیں۔ محکمہ موسمیات کا کہنا ہے کہ آئندہ 48 گھنٹوں میں مزید بارشوں کا امکان ہے۔ تمام اضلاع میں پی ڈی ایم اے، لیویز، ایف سی اور متعلقہ ادارے ہائی الرٹ ہیں۔
