عوامی لیگ کی رجسٹریشن معطل کیے جانے کے بعد الیکشن کمیشن نے جماعت کے تاریخی انتخابی نشان ’کشتی‘ کو اپنی ویب سائٹ سے ہٹا دیا ہے، جو کئی دہائیوں سے عوامی لیگ کی سیاسی پہچان رہا ہے۔
یہ بھی پڑھیں:بنگلہ دیش اور امریکا کے درمیان محصولات سے متعلق جامع مذاکرات کا دوبارہ آغاز
الیکشن کمیشن کی ویب سائٹ پر عوامی لیگ کو ’رجسٹرڈ سیاسی جماعتیں (رجسٹریشن معطل)‘ کے تحت چھٹی جماعت کے طور پر درج کیا گیا تھا۔ گزشتہ روز تک جماعت کے نام کے ساتھ ’کشتی‘ کا نشان بھی موجود تھا، تاہم آج صبح اسے ہٹا دیا گیا۔
الیکشن کمیشن کے سسٹم مینیجر محمد رفیق الحق نے بنگلہ دیشی میڈیا سے گفتگو کرتے ہوئے تصدیق کی کہ یہ اقدام اعلیٰ حکام کی ہدایات پر کیا گیا ہے۔
یاد رہے کہ 12 جولائی کو نیشنل سٹیزن پارٹی (NCP) کے ایک وفد نے چیف الیکشن کمشنر سے ملاقات کر کے مطالبہ کیا تھا کہ عوامی لیگ کی رجسٹریشن معطلی کے بعد ’کشتی‘ کے انتخابی نشان کو بھی فہرست سے نکال دیا جائے۔
دلچسپ بات یہ ہے کہ حالیہ دنوں میں الیکشن کمیشن کے کمشنر عبد الرحمان مسعود نے یہ بیان دیا تھا کہ نشان کبھی ممنوع نہیں ہوتے، کشتی کا نشان عوامی لیگ کو دیا گیا تھا، لیکن نشان الیکشن کمیشن کی ملکیت ہوتا ہے اور پارٹی کے تحلیل ہو جانے کی صورت میں بھی نشان کمیشن کے پاس ہی رہتا ہے۔
فی الوقت بنگلہ دیش میں 50 رجسٹرڈ سیاسی جماعتیں موجود ہیں جن کے لیے الیکشن کمیشن نے 69 انتخابی نشانات مختص کر رکھے ہیں۔ تاہم اس تعداد کو 115 تک بڑھانے کی تجویز قانون وزارت کو بھیجی جا چکی ہے۔
عوامی لیگ کے انتخابی نشان ’کشتی‘ کو ہٹایا جانا ملک کی انتخابی سیاست میں ایک اہم موڑ کے طور پر دیکھا جا رہا ہے، جو پارٹی کے مستقبل پر گہرے سوالات اٹھاتا ہے۔
