پاکستان ویمنز کرکٹ ٹیم کی کپتان فاطمہ ثنا نے کہا ہے کہ ٹیم آئرلینڈ کے دورے میں فتوحات کے سلسلے کو جاری رکھنے کے لیے پُرعزم ہے۔
نیشنل اسٹیڈیم کراچی میں میڈیا سے گفتگو کرتے ہوئے انہوں نے کہا کہ اگرچہ آئرلینڈ کی کنڈیشنز مختلف ہوں گی، تاہم ہماری بیٹرز پُراعتماد ہیں اور حالیہ کوالیفائرز میں عمدہ کارکردگی کے بعد ٹیم ایک مثبت سوچ کے ساتھ میدان میں اترے گی۔
فاطمہ ثنا نے کہا کہ بطور آل راؤنڈر وہ بیٹنگ، بولنگ اور فیلڈنگ میں ٹیم کی کامیابی کے لیے ہر ممکن کردار ادا کرنے کی کوشش کرتی ہیں۔ میری پوری توجہ اس وقت اپنی بیٹنگ کو بہتر بنانے پر ہے تاکہ کسی بھی صورتحال میں ٹیم کے لیے مفید ثابت ہو سکوں۔
یہ بھی پڑھیے: عاقب جاوید کا ویمنز کرکٹ اور نوجوان کھلاڑیوں کی تربیت کے لیے اہم اعلان
انہوں نے کہا کہ ہم اس جیت کے تسلسل کو برقرار رکھنے کی پوری کوشش کریں گے۔ اس کے ساتھ ساتھ ہم ٹی20 اسکواڈ کو مزید بہتر بنانے پر بھی کام کر رہے ہیں۔
ٹیم کی اوپنر منیبہ علی نے بھی آئرلینڈ کے دورے کے حوالے سے اپنے خیالات کا اظہار کرتے ہوئے کہا کہ اگرچہ آئرلینڈ کی سیریز اور ورلڈ کپ کے فارمیٹ مختلف ہیں، تاہم اس وقت ہماری توجہ ٹی20 فارمیٹ پر مرکوز ہے، جبکہ 50 اوورز کی کرکٹ پر بھی تیاری کا سلسلہ جاری ہے۔
یہ بھی پڑھیے: ویمنز کرکٹ ورلڈ کپ کے مقامات، تاریخوں کا اعلان، پاکستان کے لیے نیوٹرل وینیو بھی شامل
منیبہ علی کا کہنا تھا کہ کوالیفائرز ٹورنامنٹ میں سامنے آنے والی خامیوں کی نشاندہی کی گئی تھی، اور ٹریننگ کیمپ میں ان پر خصوصی محنت کی گئی ہے۔ ہم نے مثبت پہلوؤں کو مزید بہتر بنانے کی بھی کوشش کی ہے تاکہ آنے والے چیلنجز کا بہتر انداز میں مقابلہ کیا جا سکے۔
اس سے قبل گزشتہ دنوں پاکستان کرکٹ بورڈ نے آئرلینڈ کے خلاف 3 میچوں پر مشتمل ٹی20 سیریز کے لیے خواتین کرکٹ ٹیم کا 15 رکنی اسکواڈ اعلان کر دیا۔ فاطمہ ثنا بدستور کپتان برقرار رہیں گی، جبکہ 22 سالہ دائیں ہاتھ کی بیٹرایمن فاطمہ کو پہلی بار قومی اسکواڈ میں شامل کیا گیا۔
