خیبر پختونخوا کے ضلع کوہاٹ کے علاقے ریگی شینو خیل میں ہفتے کی شب ذاتی دشمنی کے نتیجے میں فائرنگ کے ایک المناک واقعے میں 7 افراد جان کی بازی ہار گئے۔
پولیس کے مطابق ابتدائی تحقیقات سے معلوم ہوا ہے کہ یہ واقعہ پرانی دشمنی کا شاخسانہ تھا۔ زخمی مدعی زاہد نور نے بیان دیا کہ وہ اپنے اہل خانہ کے ساتھ ٹانڈہ ڈیم پر پکنک منانے گئے تھے اور واپسی کے دوران نامعلوم افراد نے گھات لگا کر گاڑی پر فائرنگ کی، جس کے نتیجے میں 6 افراد موقع پر ہی دم توڑ گئے جبکہ ایک زخمی اسپتال میں جانبر نہ ہو سکا۔
مزید پڑھیں: خیبر پختونخوا میں بارشوں اور سیلاب سے 314 ہلاکتیں، بونیر سب سے زیادہ متاثر، پی ڈی ایم اے رپورٹ
ڈسٹرکٹ پولیس افسر (ڈی پی او) کوہاٹ ڈاکٹر زاہد اللہ نے بتایا کہ جاں بحق افراد کو خاندانی دشمنی کی بنیاد پر نشانہ بنایا گیا۔ حملے کے وقت گاڑی میں کل 11 افراد سوار تھے، جن میں سے 7 کو حملے کا نشانہ بنایا گیا۔ مقتولین اور زخمیوں کا تعلق کرم ضلع کی تحصیل صدہ سے ہے، اور یہ طویل عرصے سے کوہاٹ کے علاقے محمد زئی گاؤں میں مقیم تھے۔
پولیس نے نامعلوم حملہ آوروں کے خلاف مقدمہ درج کر کے تفتیش شروع کر دی ہے۔ واقعے کے بعد لواحقین نے لاشیں ہنگو روڈ پر رکھ کر احتجاج کی کوشش کی، تاہم مقامی عمائدین اور پولیس کی یقین دہانی پر مظاہرین منتشر ہوگئے۔
