معروف امریکی کمپنی میریکل سالٹ ورکس کولیکٹیو ان کارپوریشن نے پاکستان میں پائے جانے والے پنک ہمالین سالٹ کے ذخائر نکالنے اور ایکسپورٹ کی مد میں دو سو ملین ڈالر سرمایہ کاری کی پیشکش کردی۔
نمک کی درآمد، تیاری اور سپلائی کے حوالے سے شہرت یافتہ معروف امریکی کمپنی میریکل سالٹ ورکس کولیکٹیو اِن کارپوریشن نے سفیر پاکستان مسعود خان سے ملاقات میں یہ پیشکش کی اور انہیں اس حوالے سے باقاعدہ بریفنگ دی۔
امریکا کی مختلف ریاستوں اور برطانیہ سے پاکستان آںے والی میریکل سالٹ ورکس کولیکٹیو ان کارپوریشن کی اعلی قیادت کے وفد میں صدر اور سی ای او احمد این خان، نائب صدر ٹیڈ ایم بالنٹائن، چیف کمیونی کیشن آفیسر محمد ایم خان، جیفری میلنڈر، ایم شمشیر خان، مارٹن عنصر (وینکوور کینیڈا)، نسیم طیب (وینکوور کینیڈا)، ڈین ٹیریٹ (وینکوور کینیڈا)، رانا ریحان انور (سینٹ لوئس)، ٹونی گارسن (لندن انگلینڈ) اور عتیق رانا ( سینٹ لوئس) شامل تھے۔
کمپنی نے سفیر پاکستان مسعود خان کو بتایا کمپنی پاکستان میں پائے جانے والے پنک سالٹ کو نکالنے، پروسیسنگ اور اس کی عالمی سطح پر تقسیم میں تقریباً دو سو ملین ڈالر کی سرمایہ کاری کرے گی۔
سفیر کو بریفنگ کے دوران بتایا گیا کہ پاکستان میں پنک سالٹ کے وسیع ذخائر موجود ہیں جس کی سالانہ آمدنی 12 ارب ڈالر تک ہو سکتی ہے۔ ایک اندازے کے مطابق پاکستان کے پاس تقریباً 22.22 ارب ٹن پنک سالٹ کے قدرتی وسائل موجود ہیں جو زیادہ تر کالا باغ، ورچہ، کھیوڑہ اور بہادر خیل کے سالٹ رینج کے علاقوں میں پائے جاتے ہیں۔ ان ذخائر کی بدولت بڑے پیمانے پر معاشی سرگرمیاں شروع کرنے کی بے پناہ صلاحیت موجود ہے۔
بتایا گیا کہ پالیسی فریم ورک، پروسیسنگ، پیکیجنگ اور عالمی سطح پر تقسیم کے لیے سہولیات کی کمی کے سبب اس وقت پاکستان اس منفرد نمک کی ایکسپورٹ سے صرف 70 ملین ڈالر کماتا ہے جبکہ یہ صلاحیت تقریباً بارہ ارب ڈالر سالانہ ہے۔
پاکستانی سفیر مسعود خان نے کہا کہ گلابی نمک کی نہ صرف خطے بلکہ پوری دنیا میں ایک بہت بڑی مارکیٹ ہے جو اس شعبے میں منافع بخش کاروباری منصوبے کی ضمانت دیتی ہے، انہوں نے وفد کو یقین دلایا کہ سفارت خانہ کمپنی کو اپنے کاروباری منصوبے کو جلد حتمی شکل دینے اور اس پر عمل درآمد میں ہر ممکنہ سہولت کاری فراہم کرے گا۔
