ایک طرف پاکستان کا مستقبل اور دوسری طرف نشئی، کراچی کے گراؤنڈ کی افسوسناک ویڈیو منظر عام پر

چنیسر فٹبال گراؤنڈ میں نوجوان کھلاڑیوں کی تربیت کے دوران نشے کی حالت میں موجود افراد کی بڑھتی ہوئی تعداد نے مقامی کمیونٹی میں تشویش کی لہر پیدا کر دی ہے۔ جہاں بچے اپنی فٹبال کی مشقیں کر رہے ہیں، وہیں متعدد نشئی حضرات گراؤنڈ میں موجود ہیں جو کھیل کے ماحول کو غیر محفوظ بنا رہے ہیں۔

ایک صارف نے ویڈیو شیئر کرتے ہوئے کہا کہ آئیے میں آپ کو پاکستان کی بربادی دکھاؤں، ایک طرف چھوٹے بچے گراؤنڈ میں میچ کھیل رہے ہیں اور وہیں پیچھے تمام نشئی حضرات بیٹھے ہوئے ہیں۔ اور یہ تماشا چنیسر فٹبال گراؤنڈ میں کافی عرصے سے چل رہا ہے۔

ان کا کہنا تھا کہ یہاں اکیڈمی کے کھلاڑی ٹریننگ کر رہے ہیں۔ لیکن گراؤنڈ میں نشہ آور افراد کی موجودگی نے ماحول کو غیر محفوظ اور غیر موزوں بنا دیا ہے۔ متعدد بار نشئی افراد کو روکا گیا لیکن ان کی تعداد میں کوئی کمی نہیں آئی، جس سے مقامی کمیونٹی سخت پریشان ہے۔

شہری نے حکومت پاکستان اور مقامی انتظامیہ سے اپیل کی ہے کہ وہ فوری طور پر اس مسئلے کا حل نکالیں کیونکہ یہ بچے ہمارا مستقبل ہیں، ان کا کہنا تھا کہ یہ صرف ہمارے نہیں بلکہ آپ کے بھی بچے ہیں۔ جن کی حفاظت کرنا ہم سب کی ذمہ داری ہے۔