ایپل کے سابق ملازمین کی اے آئی ایپ ’اسکائی‘ اوپن اے آئی کا حصہ بن گئی ہے۔
اوپن اے آئی نے میک پر چیٹ جی پی ٹی کے انضمام کو مزید بہتر بنانے کے لیے ایپل شارٹ کٹس کے خالق ادارے کو خرید لیا ہے۔
یہ بھی پڑھیں: اوپن اے آئی نے فری یوزرز کے لیے چیٹ جی پی ٹی کا ’پروجیکٹس‘ فیچر متعارف کرا دیا
حال ہی میں اوپن اے آئی نے اپنا نیا اے آئی براؤزر ایٹلس متعارف کرایا تھا، جس کے چند روز بعد کمپنی نے سافٹ ویئر ایپلیکیشنز انکارپوریٹڈ اور اس کی اے آئی ایپ ’اسکائی‘ کے حصول کا اعلان کیا۔ یہ ایپ ایپل کے سابق ملازمین نے تیار کی تھی۔
رپورٹس کے مطابق، ایری وائن اسٹین اور کونراڈ کریمر، جنہوں نے ایس اے آئی کی بنیاد رکھی، ایپل کے شارٹ کٹس ایپ کے اجرا میں اہم کردار ادا کیا تھا۔ 2017 میں ایپل نے ان کی مقبول ایپ ’ورک فلو‘ خریدی تھی، جو آئی او ایس کے لیے ایک آٹومیشن ایپ تھی۔
یہ بھی پڑھیں:ایپل کی اوپن اے آئی سے شراکت داری، نئے فیچرز کیا ہیں؟
کونراڈ کریمر نے 2019 میں اور ایری وائن اسٹین نے 2023 میں ایپل چھوڑ دیا تھا۔ دونوں نے بعد میں مل کر ’اسکائی‘ پر کام شروع کیا۔ اگرچہ یہ ایپ عوام کے لیے جاری نہیں کی گئی، تاہم بتایا جا رہا ہے کہ یہ میک کے لیے ایک طاقتور نیچرل لینگویج انٹرفیس ہے، جو صارف کے ساتھ تحریر، منصوبہ بندی، کوڈنگ یا روزمرہ کاموں میں معاونت فراہم کر سکتی ہے۔
اوپن اے آئی کا کہنا ہے کہ وہ ’اسکائی‘ کی ٹیکنالوجی کو چیٹ جی پی ٹی کے ساتھ ضم کر کے میک او ایس میں گہرائی سے شامل کرنا چاہتی ہے تاکہ صارفین کو اے آئی کے ذریعے براہ راست اپنے روزمرہ ٹولز میں مدد مل سکے۔
یہ بھی پڑھیں: مصنوعی ذہانت سے ویڈیو کی تخلیق، اوپن اے آئی نے سورا 2 لانچ کردیا
کمپنی کے نائب صدر نک ٹرلی کے مطابق، مقصد ایک ایسا نظام تیار کرنا ہے جو صرف جوابات دینے کے بجائے صارف کے کام مکمل کرنے میں عملی مدد فراہم کرے۔
