وزیر مملکت برائے خزانہ بلال اظہر کیانی نے پیر کے روز کہا ہے کہ نجکاری پالیسی پر تمام اتحادی جماعتوں، بشمول پاکستان پیپلز پارٹی میں مکمل اتفاق رائے موجود ہے۔
اسلام آباد میں میڈیا سے گفتگو کرتے ہوئے بلال اظہر کیانی نے حکومت کے نجکاری کے عمل کو تیز کرنے کے عزم کا اعادہ کیا۔
یہ بھی پڑھیں:فرسٹ ویمن بینک کی نجکاری کا معاہدہ، وزیراعظم شہباز شریف اور فیلڈ مارشل عاصم منیر کی شرکت
انہوں نے بتایا کہ حکومت نے فرسٹ ویمن بینک لمیٹڈ کی نجکاری مکمل کر لی ہے، جبکہ پاکستان انٹرنیشنل ایئرلائنزاگلا ادارہ ہوگا جس کی نجکاری کی جائے گی۔
یاد رہے کہ حال ہی میں متحدہ عرب امارات کی کمپنی انٹرنیشنل ہولڈنگ کمپنی نے فرسٹ ویمن بینک لمیٹڈ کے 82.64 فیصد حصص 4.1 ارب روپے میں خرید لیے ہیں۔
سرکاری حکام کے مطابق، یہ اقدام پاکستان اور یو اے ای کے درمیان معاشی تعاون کے فروغ کی جانب ایک اہم قدم ہے۔
مزیدپڑھیں:پی آئی اے کی نجکاری میں تاخیر کیوں ہو رہی ہے؟
دوسری جانب حکومت آئی ایم ایف پروگرام کے تحت پی آئی اے کی نجکاری کے عمل کو آگے بڑھا رہی ہے، جو 2025 کی چوتھی سہ ماہی میں مکمل ہونے کی توقع ہے۔
بلال اظہر کیانی نے کہا کہ نجکاری کا بنیادی مقصد سرکاری اداروں میں حکومت کے کردار کو کم کرنا، خدمات کی فراہمی میں بہتری لانا، اور خسارے میں جانے والے اداروں کو منافع بخش بناتے ہوئے عوام پر مالی بوجھ کم کرنا ہے۔
انہوں نے کہا کہ نجکاری کا عمل ایک جامع اصلاحاتی فریم ورک کا حصہ ہے۔
مزیدپڑھیں: سیلز ٹیکس فراڈ میں 5 کروڑ سے کم رقم پر گرفتاری نہیں ہوگی، وزیر مملکت برائے خزانہ بلال اظہر کیانی
ریلوے کے حوالے سے بات کرتے ہوئے انہوں نے بتایا کہ پاکستان ایم ایل-1 کے کراچی تا روہڑی حصے اور ایم ایل-3 کے روہڑی تا نوکنڈی حصے کو دسمبر 2028 تک مکمل کرنے کا ہدف رکھتا ہے، جبکہ منصوبے کا سنگ بنیاد اگلے سال رکھنے کی امید ہے۔
انہوں نے مزید بتایا کہ ایشیائی ترقیاتی بینک کے ساتھ 2 ارب ڈالر کے مالیاتی پیکیج پر بات چیت جاری ہے، جبکہ ریکوڈک مائننگ کمپنی کے ساتھ بھی مذاکرات ہو رہے ہیں۔
وزیر مملکت نے کہا کہ وزیراعظم کی براہِ راست نگرانی میں مختلف اداروں، بشمول نیشنل ٹیرف کمیشن میں اصلاحات نافذ کی جا رہی ہیں۔
